Lars Erik Gabrielsen sanaartortitsinissamut marlunnut qinnuteqarpoq, ajornartorsiuteqarporli

Sanaartornissamut qinnuteqaatit marluk Lars Erik Gabrielsenip suliffeqarfiutaaneersut Avannaata Kommuniata nittartagaani maanna takuneqarsinnaapput.

Sanaartornissamut qinnuteqaat siulleq tassaavoq Ilulissani Zionip oqaluffiata eqqaani, nunami eriagisami akunnittarfiliornissamut qinnuteqaat. Aappaalu tassaalluni nutaanik inissialiornissamut suliniummut qinnuteqaat. 

Danmarkimi tusagassiornermik ilinniarfimmi kommunit pillugit ilisimatuup Roger Buch-ip qinnuteqaatit marluk tupaallaatigalugit KNR-imut oqarpoq.

- Suliamut qanippallaartuusinnaanerata eqqarsaatigineqarsimarpasinnginnera tupinnaqaaq. Politikerit nammineq iluaqutissatik kommunimi aalajangiinerni ilannguttussaanngilaat, tassa sumulluunniit attuumassuteqannginneq taama isumaqarpoq, taanna oqarpoq.

Uani suliami borgmesterimut attuumassuteqarnera qanippallaartoq, immikkut ilisimasalik oqarpoq. Taamaattumik borgmesteri aalajangiinernut ilaasinnaatitaanngilaq. Aalajangiinissamulluunniit piareersarnernut imaluunniit inerniliussatut aalajangiinerni peqataasinnaanngitsoq Roger Buch erseqqissaavoq.

Inatsimmik unioqqutitsinerusoq

Unique Tours Ilulissat titartaatitsisuusut qinnuteqaatini marlunni allaqqavoq. Taannalu suliffeqarfik A.A.N.Møller Aps-imit aamma ingerlatarineqarpoq, tassanilu Lars Erik Gabrielsen pisortaavoq.

Qinnuteqaammi siullermi borgmesterip atia ersinngilaq, qinnuteqaatilli aappaani tassa inissialiorniarluni qinnuteqaammi borgmesteri Lars Erik Gabrielsen suliaqartitsisuusoq allaqqavoq. 

Borgmesteri nammineq suliffeqarfinnut pineqartunut piginnittuunngikkaluaruniluunniit suliffeqarfiillu ilaqutaasa ingerlatarippatikkit, suli inatsisinik unioqqutitsinerusoq, Roger Buch oqarpoq.

- Pineqartoq aningaasatigut attuumassuteqarpat, soorlu assersuutigalugu suliffeqarfimmi piginnittuuppat, taava tassa pisumut attuumassuteqassaaq. Inatsimmi allaqqavoq, sumulluunniit attuumassuteqannginnissaq. Tassanilu ilaavoq, ilaquttat qaninnerit sullinneqannginnissaat. Soorlu, aapparisaq, qitornat angajoqqaallu. Uani pineqartumi namminerlunniit piginnittuunngikkaluarpat, suliffeqarfilli ilaquttanit pigineqarpat taava borgmesteriusup attuumassuteqarnera ilimagineqarluinnarsinnaavoq. 

Kommunimi borgmesteri qaffasinnerpaavoq, taamaammat sulisut pisortarisaminnut akuersisariaqartutut misigisimanissaat pinngitsoortinniarlugu, suliaq allatut ingerlanneqarsimasinnaagaluartoq Roger Buch erseqqissaavoq.

-Sulisut pinngitsaalineqartutut tassa suliamut akuersisariaqartut misiginnginnissaat pingaaruteqarpoq. Imaanngitsoq, borgmesteri pinngitsaaliiniarsaraluni sunniinniartoq. Borgmesterilli pineqarnera ilisimaannarlugu, suliamut akuersisariaqartutut sulisut misigilersinnaapput, taanna oqarpoq.

Qinnuteqaatit aallaqqaataaneertariaqaraluartut

Roger Buch naapertorlugu, Borgmesterip suliamut attuumassuteqarnera peqqutaalluni, Ilulissani sanaartortitsissamut suliniut iluatsissappat, kommunimit allamit suliaq aqunneqartariaqartoq ilanngullugu oqaatigaa. 

- Taamaammanuna inatsisilerinermi taaneqartartumi, ‘oqartussaasutut qanippallaarneq’, ima pisoqartartoq: “uani suliami borgmesteri pineqarpat kommune tamarmi qanippallaartutut nalilerneqarsinnaavoq, taamaammallu kommunemit allamit suliarineqartariaqassaaq. 

Taamaammat Avannaata Kommuniani pisortaanerup akisussaaffik tigusariaqaraa, Roger Buch isumaqarpoq.

- Kommunemi pisortaanerusoq ima oqarsimassagaluarpoq, “Atagu, una ajornartorsiutaasinnaavoq, misissortariaqassuarput.” Taava attuumassuteqarnersoq kommunep inatsisilerituuisa misissussavaat. Taamaattoqarpallu qanoq iliortoqassava?

Borgmesteri Lars Erik Gabrielsennip suliniuummi qanoq attuumassuteqartiginera, Avannaata Kommuniani atorfilittanit sukkanerpaamik misissorneqartariaqartoq, Kommunit pillugit immikkut ilisimasalik Roger Buch oqarpoq. Taamaanngippammi, borgmesterip qinnuteqaataa atorunnaarsinneqassammat, suliarlu naqqaniit suliarineqartussanngussammat. 

- Sumulluunniit attuumassuteqannginnissaq pingaaruteqarnerpaat ilagaat, taamaammanuna kommunini ingerlatsinermut inatsisini allaqqasuni siullersaasoq, taanna oqarpoq.

Lars Erik Gabrielsen apersorniarlugu KNR-imiit attavigaarput, apersorneqarnissanili kissaatiginngilaa.