KAK: Timersoqatigiiffiit nammineq akisussaaffigivaat
- Soorunami ajorpoq, taamaattussaanngikkaluarpoq angallannerit peqqutaallutik uninneri. Tamanna nalinginnaasuunngilaq. Soorunami uagut KAK-minngaanniit uggoralugu nalunaarutigaarput, piffissarmi aalajangerneqareersimavoq.
Kalaallit Arsaattartut Kattuffianni siulittaasoq, Benjamin Kielsen oqarpoq.
Timersoqatigiiffiillu pingasut tassaasut AK Ittoqqortoormiineersut, UB-83 Upernavimmeersut unammersuarnermilu siorna pissartanngortut Nagdlúnguak Ilulissaneersut unammersuarnerni peqataasinnaannginnertik nalunaarutigaat.
- Klubbit ataasiakkaat inuttassaaleqineq tunngavigalugu peqataasinnaajunnaartut nalunngilakka.
Angallannermulli pilersaarutaasut akigititaasullu aappaagu allanngungaarnissaat ilimanaateqanngilaq.
Siusinaartumik billetsinik inniminniinissaq pisariaqartoq
- Soorunami suulluunniit siulersuisuniit aalajangiussat aaqqissuussallu akisussaaffigaavut tamannalu ingerlanneqartarpoq KAK-mi allaffimmiut peqatigalugit, Benjamin Kielsen oqarpoq nangillunilu:
- Taamannak pisoqaqqissanngippat klubbit sioqqutsingaatsiarlutik billetsinik inniminniisarnissaat kissaatiginartorujussuuvoq, Benjamin Kielsen oqarpoq.
Piffissarlu sioqqullugu billetsisimagaluaraanniluunniit apeqqutaanavianngitsoq siulittaasoq isumaqarpoq. Peqataasussammi ilaat suliffitsik sivisuumik qimaqqasinnaanngilaat.
- Naluara KAK pisuusutut inissinneqarsinnaanersoq, Benjamin Kielsen oqarpoq
Iligiiaalli arfiniliinnaat unammersuarnermut Qaqortumi ingerlanneqartussamut peqataassapput. Ukiullu tulliani qanoq pisoqarumaarnera piffissap takutittariaqassavaa.
Unammiuaarnerit aggustip ulluisa qulinganniit 15-iata tungaanut ingerlanneqassapput, KNR-TV-milu toqqaannaq aallakaatinneqartassallutik.
