Siorna pissartat arsaannermi GM-mut aamma peqataaniarunnaarput

Arsaannermi angutini inersimasuni ukioq manna nutaanik pissartanngortoqassaaq.

Nagdlúnguak Ilulissaneersoq pissartanngorniunnerni kingullerni marlunni pissartaasoq arsaattartut  kattuffiannut KAK-mut nalunaarput pissartanngorniunnermi peqataasinnaajunnaarlutik.

AK Ittoqqortoormiit aamma UB-83 Upernavimmiit aamma peqataasinnaanatik nalunaareerput.

- GM-rtoqarnissaani peqataasinnaajunnaartoqarnera naammattoortareerparput. Qaqutigoortorujussuuvorli pissartaasut peqataasinnaajunnaartarnerat, KAK-mi siulittaasoq Benjamik Kielsen KNR-mut oqarpoq.

Tamarmik imminnut unammissut

Peqataasinnaajunnaartut pingasut tamarmik angalaniarnikkut pissutsinik aporfeqarput.

Ittoqqortoormiormiut ulloq taanna GM-ip naggataarneqarnissaani apuussinnaapput aammalu Nagdlúnguak aamma UB-83 angalaniarnikkut akunnattoorlutik.

- Akisoorujussuuvoq aammalu angalanerinnarmut arsartutta ullorpassuit atortussaallugit. Taamaattumik ajuusaaraluaqaluta peqataasinnaanata nalunaarpugut, Nagdlúnguami siulittaasoq Lena Ravn Davidsen oqarpoq.

UB-83 siorna aamma peqataasoq Upernavimmiit Upernavimmullu aqqutit ulikkaaqqanerannit eqqugaavoq.

- Ilinniartorpassuit Upernavimmeersut piffissami matumani angalasarput. Aamma umiarsuit sinersortaatit Upernavimmut tikittannginnerannit eqqugaavugut umiatsianik ammaannartunik isorartoorsuarmut angalasinnaannginnatta, UB-83-mi siulittaasoq Julia Karlsen oqarpoq.

Eqaluk 54 kujataani Tasiusameersoq AK Ittoqqortoormiit taarserlugu peqataassaaq. SAK Sisimiuneersoq aamma siorna GM-m I peqataasoq UB-83 taarserlugu peqataanissamut periarfissinneqaraluarpoq qujaannarlunili.

- GM-ip aallartiffissaa taama qanillitigisoq Nagdlúnguup paarlatsissaanik toqqaasinnaanngilagut. Taamaattumik iligiit arfiniliinnaat unammersuasapput taakkulu tamarmik imminnut unammissallutik, Benjamin Kielsen ilisimatitsivoq.

Arsaannermi GM KNR-TV-mi toqqaannartumik aallakaatinneqassaaq.