Inerisaavik: Kisitsisit IMAK-ip tunngaviginiagai ilaannakorput

Ilinniartitsisut atuartitsinermut tiimit qassit ukiumut atortarneraat pillugu ilinniartitsisut kattuffiata IMAK-ip kisitsisaatai, Ilinniartitaanermullu naalakkersuisup Palle Christiansenip kisitsisaatai assigiinngillat.
Allattoq Mads Lynge
februaarip 03-at 2012 16:40

Palle Christiansen oqarpoq meeqqat atuarfiini ilinniartitsisut atuartitsinerminnut atatillugu tiimit 28 procentii taamaallaat atuartitsinermut atortaraat, ilinniartitsisut kattuffiat IMAK-ip siulittaasua Sivso Dorph oqartoq atuartitsinermut piffissaq atorneqartartoq 41 procentiusoq.

Atuartut tiimii ilinniartitsisullu akunnerit atuartitsinermut atortagaat, Franz Tremelip Inerisaavik sinnerlugu naatsorsorsimavai, ilinniartitsisullu tiimit 28 procentii taamaallaat atuartitsinermut atortaraat taassuma oqaatigaa.

- Ilinniartitsisut nalunaaqquttap akunnerini 2080-ini ukiup ingerlanerani sulisartussaapput, soorlu nunatsinni sulisut allat taamaattussaasut, kisitsisillu tassannga aallaaveqarput, Franz Tremel nassuiaavoq.

Sulinngiffeqarnerit, nalliuttut nalliuttullu sapaataanngitsut suliassallu allat peeraanni akunnerit 1.440-t sinnerussapput, ilinniartitsisullu akunnermik ataatsimik atuartitsissagaangamik akunnermik ataatsimik piareersaasinnaatitaasarmata, ilinniartitsisoq amerlanerpaamik akunnerit 720-t 730-llu akornanni atuartitsisinnaatitaavoq, taamaammat piffissaq atuartitsinermut atorneqartartoq annerpaamik 34 aamma 35-t procentit missaanniissaaq.

- Piviusorli allaavoq. Inerisaaviup kisitsisaatai atuarfiit namminneq nalunaarutigisimasaanit tunngaveqarput, ukiumilu atuarfiusumi 2009/2010-mi piffissaq atuartitsinermut atorneqarsimasoq 28 procentiusoq, Franz Tremel oqarpoq.

Piffissallu atuartitsinermut atorneqarsimasup 41 procentiuneranik IMAK-ip siulittaasuata Sivso Dorphip oqarnera marlunnik pissuteqarpoq:

Akunnerit tunngaviginiagai 2080-iunatik 1784-iupput, ullut sulinngiffeqarfiit nalliuttullu matumani ilanngaatigineqarlutik. Tamannali pissusissamisuunngilaq. Piffissaq atuartitsinermut atorneqartoq taamaasilluni annerusutut isikkoqalersarpoq, aappaattullu:
Ilinniartitsisut piffissaq atuartitsinermut atugaat amerlanerpaaffimminiittoq, Sivso Dorphip aallaavigaa.

- Tassungalu tunngatillugu taamaallaat oqaatigisariaqarpoq, Tamanna eqqortuussappat apeqqutaammat, ilinniartitsisut agguaqatigiisillugit tiimit 728-t atuartitsisarsimappata. Isumaqarpungalu taamaaliornissaq ajornartoq. Isumaqatigiissummi aalajangersakkat eqqarsaatigigaanni tamaaliortoqarsinnaanngilaq. Taamaassagaluarpammi ilinniartitsisut tamarmik atuartitsinerinnavimmik suliaqassagaluarput, Franz Tremel oqarpoq.

Ilinniartitsiut piffissap atuartitsinermut atorneqartup saniatigut allanik suliaqarsinnaanerat kommunit namminneq aqussinnaavaat, assersuutigalugu inunnik ikiuinermi suliat allallu.

- Atuartut ikileriarsimagaluarput, illuanilli ilinniartitsisut skema malillugit tiimii aammalu tiimit akissarsiaqaatigalugit meeqqamut ataatsimut atugassat malunnarluartumik amerlisimapput. Tassalu kommuniniit suliniuteqarnissaq siunertaralu taama iliortoqarsimangippat, taava tamanna aqutsiunnaarnerusimassaaq, aqunneqartariaqalersoq. Tassalu kisitsisit uanga takoriikkakka tunngavigalugit ajornerpaassappat, taama ineriartortoqarsimavoq, atuartunut sunniuteqarnerluttumik, Franz Tremel oqarpoq.