Illuatungiliuttut: Inatsisartut siulittaasuat allamik suliaqassanngilaq
Lars-Emil Johansen Inatsisartunut siulittaasuunermi saniatigut Isumalioqatigiissitami siulittaasoorusunnera Inatsisartut inatsiseqarnermut ataatsimiititaliaanut ilaasortap Demokraatineersup isornartorsiorpaa.
AAMMA ATUARUK Lars-Emil marlunnik angisuunik suliaqarusuppoq
- Inatsit tunngaviusoq pillugu isumalioqatigiissitami siulittaasunngornermigut politikkikkut pingaaruteqaqisumi aalajangeeqataasinnaalissaaq. Isumaqarpungalu Inatsisartunut siulittaasuuneranut tamanna tulluanngilluinnartoq, Demokraatineersoq Michael Rosing oqarpoq.
Inatsisartut siulittaasuat Lars-Emil Johansen, inatsit tunngaviusoq pillugu isumalioqatigiissitami siulittaasussatut Siumup inassutiginiarpaa. Taamaasilluni Nunatsinni tunngaviusumik inatsiseqalernissamik siunnersuusiortuni siuttunngoratarsinnaavoq.
AAMMA ATUARUK Lars-Emil isumalioqatigiissitami siulittaasunngortoq
Michael Rosingili tamatumunnga isornartorsiuivoq, erseqqissaatigalugulu Inatsisartut siulittaasuat politikkikkut oqimaaqatigiittumik sulisussaasoq tamallu oqartussaaqataaneranni tunngaviusumik periutsit malittussaallugit.
- Taamaammat suliamut taama politikkertaqartigisumut, inatsit tunngaviusoq pillugu isumalioqatigiissitatut ittunut, peqataasinnaanngilaq, Michael Rosing oqarpoq.
AAMMA ATUARUK Rosing: Inatsisartut allamut sangusoorput
Inatsisartullu siulittaasuata isornartorsiut tunngavissaqarsorinngilaa.
- Tamanna inatsisitigut aporfissaqanngilaq.
Inatsisartut siulittaasoqarfiat aamma Qinigaasinnaassuseq pillugu Ataatsimiititaliap aalajangigassarigaa, Lars-Emil Johansen oqarpoq.
- Qinigaasinnaassuseq pillugu Ataatsimiititaliaq aamma aperineqassooq. Aperineqarsinnaasut aperineqartariaqartullu tamarmik aperineqassaqqaarput, Lars-Emil Johansen oqarpoq.
