Sisimiuni innuttaasut: Suila-tapit nalornissutaasimasut eqqissiallaatigineqartut
Innuttaasut arlallit Suila-tapinut tunngatillugu aaqqiisoqarnera eqqissiallaatigaat.
Suila-tapit tassaapput sulinermut ilanngaatit tunniunneqartartussat. Tassa imaappoq, sulinermik inuussutissarsiuteqartunut 70.000 koruunit 500.000 koruunillu akornanni isertitalinnut, isertitaat apeqqutaatillugit, tunniunneqartartussat. Aningaasat qaammammut 1.313 koruunit tungaannut amerlatigisinnaapput.
Innuttaasut tusindilikkaat Suila-tapisiaqarpallaarsimasut utertitseqquneqarnerat Sermitsiap aggustimi allaaseraa.
Innuttaasullu ilaat tapisiakippallaarsimallutik suli tapisiassaqartut saqqummiunneqarluni.
Tassanngaanniilli suliaq allatut inernilerneqarpoq. Aningaasaqarnermut Naalakkersuisoqarfiup innuttaasut akiligassinneqarsimasut tapisiaqarpallaarsimagaluartulluunniit akiliissanngitsut arfininngornermi nalunaarutigaa.
Taamaalillutik aningaasat oqartussanit piumasarineqaraluartut Nunatta karsianut ikineqanngitsuussapput.
Ritzauip allaaserinninneratut aningaasat 40 millionit koruunit pineqarput. Aningaasat akileeqqusissutinut, naalakkersuisut innuttaasunut 19.000-inut nassiussimasaannut, naapertuupput. Tamanna pillugu naalakkersuisut Ritzauimut paasissutissiipput.
Sisimiuni innuttaasut, KNR-imit ataasinngornermi apersorneqartut, innuttaasut Suila-tapinut akiliissannginnerat nuannaarutigaat.
- Akiliisussaajunnaarnera isumanni ajorinngilara. Aaqqinneqartoq taanna torragivara, Cecilie Lundblad oqarpoq.
Jens Heinrichip aamma tamanna eqqissiallaatigaa.
- Tuallattorujuuvunga meerakkaalaarluni tuallannaqqutaavoq.
Kukkussuteqartoqarsimanera nalornisitsilersoq
Innuttaasut arlallit Suila-tapisisimanngikkaluarlutik aamma akiligassinneqarsimapput. Tamanna nukillaajallannermik kinguneqarlunilu oqartussat tatiginissaannut nalornisitsilersimavoq.
- Soorunami ukua nalinginnaasumik Suila-tapisineq ajortut, taamatut akiligassitsissimanissaat qularinngilara nuannarineqarnavianngitsoq. Taavalu piffissap sivikitsup iluani atorunnaarsinneqarluni, Cecilie Lundblad oqarpoq ileqimisaartorlunilu.
Jens Heinrichip oqarneratut taama kukkussuteqarneq oqartussat tatiginarpiarunnaarput.
- Eqqarsaammertorujuuvunga Suila-tapinut suliarinnittunut tatiginassusaa ungasilliartulertoq. Peqqutaalluni sorleq eqqortuunersoq paasiuminaatsikkiartulerakku nikeralermata taamatut.
- Eqqortumik naatsorsuippaat? Ilumut uagut atuisuusugut iluamik sullinneqartarpugut?
Innuttaasut tapisiaqarpallaarsimallutik akiligassaminnik tamakkiisumik ilaannakortumilluunniit akiliisimasut, aningaasat, sapaatit akunneri marluk tulliuttut ingerlaneranni, utertinneqarnissaat naatsorsuutigisinnaavaat.
