Suila-tapinut akiligassinneqarsimasut akiliissanngitsut

Suila-tapinut akiligassinneqarsimasut nuannaarutissaqalerput.

Naalakkersuisut Suila-tapinut 2025-mut tunngatillugu utertitsilluni akiliisoqannginnissaa aalajangiuppaat. Tamanna tusagassiuutinut nalunaarummi arfininngornermi ullaap tungaani allapput.

’Innuttaasut amerlasuut Suila-tapinut atatillugu pakatsineq nalorninerlu misigisaat Naalakkersuisut paasilluarpaat. Taamaammat Naalakkersuisut Aningaasaqarnermut Akileraartarnermullu Ataatsimiititaliamut aningaasat akiligassanngortinneqartut nalikillilerneqarlutik isumakkeerneqarnissaannut akuersissuteqarnissaat ippassaq qinnuteqaatigaat’, Aningaasaqarnermut Naalakkersuisoqarfik tusagassiuutinut nalunaarummi allappoq.  

- Paasissutissat pisortanit pissarsiarineqartut innuttaasutut tatigineqarsinnaasussaapput. Tamanna matumani pisimanngilaq, tamannalu utoqqatsissutigaarput. Innuttaasut ilaat kukkussuteqarnatik amerlavallaartunik aningaasanik tunineqarsimapput, tassungalu akisussaaffik innuttaasuni ataasiakkaaniinngilaq, Aningaasaqarnermut Naalakkersuisoq Aqqaluaq B. Egede oqarpoq. 

Akerliussutsimik takutitsinissaraluaq taamaatiinnarneqartoq

Suila-tapinut akileeqqusissutinut tunngatillugu arfininngornermi akerliussutsimik takutitsisoqartussaangaluarpoq. Akerliussutsimilli takutitsinissamut aaqqissuisup Marie Didriksenip taamaatiinnarneqartoq pillugu, tusagassiuutinut nalunaarut saqqummiunneqareersoq KNR-imut paasissutissiivoq. 

Facebookikkullu allappoq:

- Nuannersumik nutaarsiassaq atuarpara, tassa Suila-Tapinut akileeqqusissutit atorunnaarsinneqarput. 

Taamaattumik akerliussutsimik takutitsinissaraluaq tunngavissaaruppoq. 

Kisianni uanga qanigisakkalu nutaarsiassaq nuannersoq saqqummiukkusullugu nal. ataatsimut Amisut eqqaanniissaagut! Akerliussutsimik takutitsinata nuannaassaagut. Tusarneqarpugut tamannalu nalliuttorsiutigissavarput. 

Innuttaasut Suila-tapinik amerlavallaartunik tunineqarsimasut utertitillutik akileereersut, akiliutaat utertinneqassapput.  

- Naalakkersuisut suliaq ilungersunartutut isigaat. Kukkunerit ilinniarfigissavagut. Piffissaq utertissinnaanngilarput, akisussaaffimmilli tigusilluta aaqqissuussami kukkunernik innuttaasut akiliisissanngilagut. Tamannalu maanna iliuuseraarput, Aqqaluaq B. Egede tusagassiuutinut nalunaarummi oqarpoq.

Aningaasat qanoq amerlatigineri tusagassiuutinut nalunaarummi allaqqanngillat.