Siulittaasoqarfiup isummani allanngortikkaa: USA-mut isumaqatigiissut ataatsimiititaliamut maanna ingerlateqqinneqarpoq

Inatsisartuni Siulittaasoqarfiup aalajangernera ataasinngormat ersarippoq.

Nunatta, USA-p Danmarkillu isumaqatigiissutaa politikerillu ataasinngormat akunnerni sisamani oqaluuserisaat aappassaanneerneqartussanngortinneqarpoq.

Aalajangernerli taanna marlunngornermi allanngortinneqarpoq.

- Siulittaasoqarfik aalajangerpoq, periarfissat oqaluusereriarlugit immikkoortoq 249, aappassaanneerneqartinnani nunanut allanut sillimaniarnermullu ataatsimiititaliamut ingerlatinneqaqqaassasoq, Kim Kielsen Inatsisartuni marlunngornermi oqarpoq.

Sillimaniarnermut isumaqatigiissutip oqaluuserineqarnera naammassimmat toqqaannartumik aappassaanneerneqartussanngortinneqarnera aamma isornartorsiorpoq.

Partiimmi arlallit isumaqatigiissutip ataatsimiititaliamut ingerlateqqinneqarnissaa ammaffigaat.

Siulittaasup aalajangernera naammagittaalliutigigaa

Inatsisartuni Siulittaasoqarfiup isumaqatigiissummik toqqaannartumik aappassaanneerneqartussanngortitsiniarluni aalajangernera Siumup naammagittaalliutigisimallugu tusagassiuutinut nalunaarummi allappaa.

Demokraatit, Inuit Ataqatigiit, Naleqqap Siumullu isumaqatigiissutip ataatsimiititaliamik suliarineqaqqaarnissaa kissaatigalugu oqariartuutigisimagaat partii allappoq.

- Ataatsimiinnermilli aqutsisup tamanna itigartippaa, immikkoortorlu ataatsimiititaliamit suliarineqaqqaartinnagu iluserisamisut suliarineqartussanngortillugu ingerlateqqippaa. Tamanna akuersaarneqarsinnaanngilaq, Erik Jensen tusagassiuutinut nalunaarummi allappoq.

Siumup oqarnera naapertorlugu isumaqatigiissummi arlalinnik ataatsimiititaliami oqaluuserineqaqqaartussaqartoq, Erik Jensenip KNR-imut ataasinngornermi oqaluuserinninnerup kingorna oqaatigaa.

- Isumaqatigiissut immini ajunngilaq, Erik Jensen oqarpoq:

- Kisianni malitsigisassai ilinniartitaanermut tunngasut, niuernermut tunngasut, akileraartarnermut tunngasut, kalaallillu salliutinneqarnissaannik naqissusiinissaq tullinnguuttoq isumaqaratta ataatsimiititaliami sukumiisumik naqissuserneqartariaqartoq.

Pele Brobergip isumaqatigiissut aappassaanneerneqartinnagu tapersernerlugu KNR-imut aamma oqaatigiumanngilaa.

- Ataatsimiititaliamut ingerlateqqipparput, taassuma kingorna aatsaat taasissutigisussaavara, Pele Broberg ataasinngornermi ataatsimiinnerup kingorna oqarpoq.

Isumaqatigiissut akuerigaa

Isumaqatigiissut nunanut allanut sillimaniarnermullu ataatsimiititaliamit maanna suliarineqassasoq Inatsisartut nittartagaanni aamma allassimavoq.

Naalakkersuisoqatigiinni partiit pingasut – Demokraatit, Inuit Ataqatigiit, Atassutillu – isumaqatigiissut taama iluseqartillugu taperserlugu oqallinnerminni oqaatigaat.

- Aappassaanneerneqarluni massakkut naqissuserneqarnissaa soorunami tassaasussaavoq uagutsinnit isumaqatigiissummik naqissusiineq, piviusunngortitsisinnaannguinnermik. Tassanngaanniit sulineq aatsaat aallartilerpoq. Isumaqatigiissutip massakkut iluani anguniarneqartut ilaalu ilanngullugit suliarisinnaanngussavagut timitalersorsinnaanngussavagut, nunanut allanut naalakkersuisoq, Múte B. Egede, KNR-imut ataasinngormat oqarpoq.

Isumaqatigiissut qaqugu aappassaanneerneqassasoq suli ullulerneqanngilaq.