Kommune Kujallermi politiini pisortaq imigassamik nioqquteqarnerup matuneqarnera pillugu: -Erseqqissumik sunniuteqarpoq
Kommune Kujallermi imigassamik nioqquteqarnerup matuneqarneraniit politiit imigassamut tunngassuteqartunut pinerlunnernik eqqissiviilliornernillu suliat ikilisimapput, Kommune Kujallermi politiini pisortaq Michael Karstenskov Olesen taama oqarpoq.
Allattoq Jonna Enoksen Dahl
oktobarip 13-at 2026 11:01
Kommune Kujallermi imigassamik nioqquteqarneq tallimanngornermi oktobarip aappaani unnukkut matuneqarpoq.
Imigassamik nioqquteqarnerup matuneqarneraniit imigassamut tunngassuteqartut pinerlunnerit Narsami, Nanortalimmi Qaqortumilu sapaatip akunnerani siullermi ikilisimapput.
- Nalunaarsorneqartut takusinnaasagut naapertorlugit, suliatsinnut sunniuteqarpoq. Suliassagut ikilipput.
Kommune Kujallermi Politiini pisortaq Michael Karstenskov Olesen oqarpoq nangillunilu:
- Tamanna erseqqissumik sunniuteqarpoq, siornatigummi suliassanut amerlasuunut imigassamut attuumassuteqartunut, soorlu inuit illoqarfimmi aalakoorlutik nalasunut orniguttarnikuuvugut.
Imigassamik nioqquteqarneq qaqugu ammaqqinneqassanersoq suli ullulerneqanngilaq.
Imigassamik nioqquteqarnerup matuneqarnerani Kommune Kujallermi pinerlunnerit imigassamut tunngassuteqartut ikilisut, imigassamik ammaaqqinnermi amerleqqissanersut Michael Karstenskov Olesen aperineqarami ima akivoq:
- Tamanna oqaaseqarfigiuminaappoq, siunissamummi siulittuisoqarsinnaanngilaq.
Nioqquteqarnerullu ammaqqinnissaanut politiit piareersimajumaartut politiit pisortaata oqaatigaa.
- Ulloq nallerpat suliassat takkuttut piareersimalluta suliariumaarpagut.
