Akileraartarnermut Aqutsisoqarfik: Suila-tapit kukkuneqarmata naatsorsueqqittoqartoq

Innuttaasut 22.000-it Akileraartarnermut Aqutsisoqarfimmit kukkusoqarnerata kingunerisaanik ukiumoortumik naatsorsuutaat aaqqinneqarput. Naatsorsuut nutaaq sapaatip akunnerata tulliani nassiunneqassaaq.

Allattoq Markus Valentin

septembarip 02-at 2026 13:28

Nutserisoq Medea Olsen

Innuttaasut 7.161-it katillugit 30,2 millionit koruuninik Suila-tapinut akiliisussanngornerat Sermitsiap qaammat kingulleq nutaarsiassiissutigaa.

Innuttaasut 9.443-t tamanna ilutigalugu amigartunik tapiissutisisimapput taamaattumillu aningaasassaqarlutik.

Akileraartarnermut Aqutsisoqarfik tusagassiuutinut nalunaarummi maanna allappoq, innuttaasut 22.000-it Suila-tapinut tunngatillugu naatsorsuutaat aaqqinneqassasut.

Aamma atuaruk Akileraarutitit misissukkit: 223 millionit koruunit innuttaasunut ukioq manna utertinneqassapput

Innuttaasut paasissutissaataanni kukkunerit pingasut tamatumunnga pissutaapput.

- Innuttaasut arlallit Suila-tapinut tunngatillugu ukiumut naatsorsuummik nutaamik tigusaqassapput, Akileraartarnermut Aqutsisoqarfik allappoq.

- Innuttaasut 160-it missaanniittut ulluni qassini tamakkiisumik akileraartussaatitaanerannut tunngasut kukkusumik naatsorneqarsimapput. Innuttaasut 22.000-t tungaannut amerlatigisut soraarnerussutisiaqalernissamut tunngatillugu paasissutissanik eqqunngitsunit taakkungannga marluusunit eqqugaapput.

Suila-tapit kukkuneqartut

Akileraartarnermut Aqutsisoqarfik, kukkunerit pingasut nassaarineqarsimasut, tamannalu pissutigalugu innuttaasut 20.000-it tungaannut amerlassusillit Suila-tapinut tunngatillugu ukiumoortumik naatsorsuutaat aaqqissorneqartariaqartut tusagassiuutinut nalunaarummi allappoq:

Innuttaasunut Kalaallit Nunaanni 2025-p ilaannaani akileraartussaasimasut naatsorsuutit kukkuneqarput.
Kalaallit soraarnerusutisiaqalernissamut paasissutissaasa ilaat kukkusumik nalunaarsorneqarsimapput.
Sulisitsisup soraarnerusutisiassanut akiligai isertitanut tunngavissatut ilanngullugit naatsorsorneqarsimanngillat.

Allisiguk

Naatsorsuut nutaaq

Ukiumut naatsorsuut nutaaq septembarip ulluisa qulinganni nassiunneqarnissaa naatsorsuutigineqarpoq.

Akileraartarnermut Aqutsisoqarfik allappoq, ukiumut naatsorsuutit nutaat nassiunneqareerpata innuttaasut akiligassaat aatsaat nassiussuunneqassasut aningaasallu tunniunneqartussat aatsaat tunniunneqassasut.

Paasissutissat nutaat tunngavigalugit innuttaasoq akiligassaqarnerulersinnaavoq aningaasanilluunniit tigusassaqarnerulersinnaalluni.

- Paasissutissat nutaat innuttaasunut nassiunneqareerpata akiliinissamut piffissaliussaq ullunik 30-nik sivisussuseqassaaq, Akileraartarnermut Aqutsisoqarfik allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.