Akileraarutitit misissukkit: 223 millionit koruunit innuttaasunut ukioq manna utertinneqassapput

223,2 millionit koruunit.

Taama amerlatigisut innuttaasunut utertinneqassapput. 

Aningaasaqarnermut Naalakkersuisoqarfik tusagassiuutinut nalunaarummi taama allappoq.  

- Akileraartarnermut Aqutsisoqarfik katillugu 223,2 mio. kr.-nik innuttaasunut utertitsissaaq, tusagassiuutinut nalunaarummi taama allaqqavoq.

Akileraartarnermut Aqutsisoqarfiup ukiumut akileraarfiusumut 2025-mut tunngatillugu akileraarpallaarutit utertissavai.

Innuttaasut katillutik 24.426-t akileraarutinit utertuussapput. Innuttaasulli 3.398-it akileraarutikippallaarsimallutik akiliissapput.   

Akileraarutikippallaarsimasut katillutik 132,5 millionit koruuninik akiliissapput.  

Ima misissorsinnaavatit

E-boksikkut Sullissivik.gl-ikkullu ’Akileraarutikka’ maanna takuneqarsinnaapput, tassanilu utertuugassaqarnerluni akiliissanerluniluunniit paasineqassaaq.  

Utertoortussat utertoorutissaat nemkontoinut kingusinnerpaamik aggustip 31-anni ikineqassapput. 

Akiliisussaagaanni nammineq akiliisoqassaaq, taamaanngippat akileraarutissavit sinneri 2027-mi akileraarutitigut ilanngaatissavit ikilinerisigut akilersinneqassapput, taamaalilluni aamma ernialiussaq 6 procent akilerneqassalluni.

Tamanna pillugu uani atuarneqarsinnaavoq, ugguuna ’Akileraarutissat sinneri’.  

Aamma Akileraartarnermut Aqutsisoqarfik Suila-tapinut ukiumoortumik naatsorsuusiorsimavoq. 2.000 koruunillu sinnerlugit amerlavallaartunik tunineqarsimaguit, aningaasat taakku 2026-p ingerlanerani tunniunneqartartuni naatsorsuinermut ilanngunneqassapput