Lars-Emil marlunnik angisuunik suliaqarusuppoq
Inatsisartut siulittaasuat inatsisit tunngaviusut pillugit isumalioqatigiissitami siulittaasussatut Siumumit toqqagaanini KNR-imut uppernarsarlugu taama oqarpoq.
- Taava tassani Vivian Motzfeldtilu qinigaavugut, taavalu uanga qinigaanikka amerlanerulaarmarta isumaqatigiissutigineqarpoq uanga siulittaasussatut Siumup siunnersuutigissagaanga, Inatsisartut siulittaasuat Lars-Emil Johansen taama oqarpoq.
Taassuma Inatsisartunut siulittaasuunermi saniatigut Isumalioqatigiissitami siulittaasutuusinnaanini Inatsisartunut siulittaasoqarfimmut akuersissutigiteqqaarniapaa.
AAMMA ATUARUK Lars-Emil isumalioqatigiissitami siulittaasunngortoq
Aviisi AG naapertorlugu Isumalioqatigiissitaq inatsisissatut tunngaviusussanut upernaaru siunnersuusiussaaq.
Isumalioqatigiissitarli suli pilersinneqartinnagu suut oqallisigineqaqqaassanersut oqaatigissallugu siusippallaarpoq.
AAMMA ATUARUK Tunngaviusumik inatsisissap tunngavia suli inissinngitsoq
Taamaattorli:
- Tassa inuiaat Kalaallit uagut kikkuunitsinnik oqaluttuartussaavoq tunngaviusumik inatsisissaq taamaattumik inuiaat Kalaallit sapinngisamik tamakkiisumik oqalliseqataanissaat pingaartorujussuuvoq, taama oqarpoq Inatsisartut siulittaasuat Lars-Emil Johansen.
AAMMA ATUARUK Tunngaviusumik inatsit Danmarkip tunngaviusumik inatsisaata ataaniissaanngilaq
AG-p pingaarnertut allaatigisaani Lars-Emil Johansen Isumalioqatigiissitami siulittaasunngussappat, tassani sulineq kalaallisuinnaq ingerlanneqassanersoq apeqquserneqarpoq.
Tamannali kissaatiginngikkini, Lars-Emil Johansen erseqqissaavoq.
- Oqallinnerit soorunami kalaallisut ingerlanneqassapput nutserisullu aqqutigalugit aamma malinnaaffigineqarsinnaassapput Kalaallisut oqalussinnanngitsut, uanga isumaga malillugu, taama Lars-Emil Johansen KNR-mut oqarpoq.
