Tunngaviusumik inatsit Danmarkip tunngaviusumik inatsisaata ataaniissaanngilaq
Nunatta namminersulernissaanut Tunngaviusumik inatsisiliornissaq pillugu isumalioqatigiissitap tunngaviusumik inatsimmik suliaqarnissaa Inatsisartunit kissaatigineqarpoq.
Taamasillutillu nalunaarusiami innersuussutigineqartut tunngaviusumik inatsimmik suliaqarneq marloriarluni pissasoq tununneqarpoq.
Nalunaarusiamimi siunnersuutigineqaraluarpoq tunngaviusumik inatsiliortoqassasoq danskit tunngaviusumik inatsisaata killigisitaata iluaniittumik, Kalaallillu Nunaata naalagaaffeqatigiinnermut peqataatillugu atuuttussaq. Siunnersuutillu aappaa tassaavoq tunngaviusumik inatsimmik suliaqartoqassasoq Nunarput Danmarkimit avissaassappat atuuttussamik.
Inatsisartut inatsisilerinermut ataatsimiititaliaata siunnersuutigaa isumalioqatigiissitami siulittaasoq siulittaasullu tullia Naalakkersuisunit toqqarneqassasut.
LÆS OGSÅ Rosing: Inatsisartut allamut sangusoorput
Partii naalakkersuisuutitaqartoq anneq siulittaasussamik innersuussissasoq nalunaarusiami innersuussutigineqaraluarpoq, kisianni aamma partii illuatungiliuttoq oqaasissaqartinneqarpoq, nalunaarusiarmi naapertorlugu siulittaasussap tullianik innersuussisinnaatitaammat.
Siunnersuutip aappassaaneerneqarnerani namminersornermut naalakkersuisup Suka K. Frederiksenip Inatsisartut inatsiseqarnermut ataatsimiititaliaata inassutai maluginarpaa.
Isumasioqatigiit qanoq iluseqarnissaanik qanorlu suliassinneqarnissaanik Naalakkersuisut kiffaanngissuseqarnatik akisussaaffigigaluarlugu, Inatsisartut, minnerunngitsumillu innuttaasut suliap ingerlarnganik ilisimatitsiniarlutik, Suka K. Frederiksenip Inatsisartut oqaluttarfianiit oqaatigaa.
Tunngaviusumik inatsisiliornissaq pillugu isumalioqatigiissitamik pilersitsisoqarnissaa Demokraatit kisiartaallutik akerleraat.
