Tunngaviusumik inatsisissap tunngavia suli inissinngitsoq
Tunngaviusumik inatsiseqalernissaq aallarnisarneqalissasoq, Inatsisartut ukiaanerani ataatsimiinneranni aalajangiunneqarmat Nunatta namminersulivinnissaa qanilliallarpoq.
Taamatullu ineriartorneq pissusissamisooraluartoq namminersulivilersigata suli oqaluuserisassaqaqisugut, Daniel Thorleifsen isumaqarpoq.
- Naalagaaffik qanoq ittoq pilersinniarparput? Naalagaaffeqatigiilluta imaluunniit ataatsimik kunngeqarlut? Nunat marluk? Tamakku assigiinngitsut eqqartorsimatinnagit qanoq ililluta tunngaviusumik inatsisissaq suliarisinnaavarput, naalagaaffik qanoq ittoq pilersinneqassanersoq nalugutsigu?, Daniel Thorleifsen oqarpoq.
AAMMA ATUARUK Namminiilivissagutta ilinniartariaqartugut
Tunngaviusumillu inatsisiliunngernermi inuusuttut ilinniakkamik naammassinnissimasut amerliartunnginnerat, Nunatta anigaasaqarnerata siunissami nalorninartoqarnera Nunatsinnilu tunngaviusumik naleqartitat siulliullugit eqqarsaatigineqartariaqartut, ilisimatooq isumaqarpoq.
- Tunngaviusumik inatsiseqalernissamik saqqummiineq imatut isikkoqarpoq soorlu illu sanarfiniagarput qalianinngaanniit aallartikkipput. Tunngavianinngaanniit aallartittariaqarpugut: pissutsit, piumasagut imaluunniit siunissamut takorluukkagut eqqartorlugit aalajangiullugillu, Daniel Thorleifsen oqarpoq.
AAMMA ATUARUK Oruluallaarneq namminiilivinnissamut aqqutissaanngilaq
Tamannalu politikeriusimasup namminersulivinnissamillu ilungersuuteqartup, Aqqaluk Lyngep isumaqatigaa.
Namminersorlutillu Oqartussat oqartussaaffinnik 32-inik naalagaaffimmit suli tigusassaqartut eqqaasitsissutigalugu.
- Naammassinngisagut naammassisariaqakkagullu massakkununa sumut killissimasut. Taanna suliaq pinngitsoorani ingerlasariaqarpoq, tunngaviusumik inatsisissamut siunnersuusiortussamik isumalioqatigiissitaqarpat taamaattoqanngippalluunniit, Aqqaluk Lynge oqarpoq.