Qulaarpaa Namminiilivissagutta ilinniartariaqartugut
Meeqqat atuarfianni atuartut ilinniagassatik suliarisassavaat, amerlanerillu ilinniaqqittariaqarput. Nunatta aningaasaqarniarnera ilorraap tungaanut sangutinneqassappat tamanna pisariaqarpoq, nunattalu namminiilivinnissaanut aamma pingaruteqarluinnassalluni.
AAMMA ATUARUK Namminiilivinnissaq unammillernartoqartoq
Aningaasaqarnermut Siunnersuisoqatigiit siulittaasuat Torben M. Andersen taama isumaqarpoq:
- Aningaasaqarniarneq iluarsineqassappat ilinniartitaanerup iluani pitsanngorsaasoqartariaqarpoq, Torben M. Andersen taama oqarpoq.
Amerlanerit ilinniareernermi kingorna atorfeqalersinnaanissaat taassuma tassa neriuutigaa.
Aningaasaqarnermut Siunnersuisoqatigiit ilinniartitaaneq ukioq manna nalunaarusiaminni immikkut sammivaat, ilinniartitaanerullu iluani ineriartorneq pitsaavallaarsimanngitsoq paasinarsivoq.
Naammi ilinniartitaanermut nukiit aningaasallu amerlanerit atorneqaraluartut pitsanngoriaatit killeqarput, inernerillu ilimagisamiit ajornerusut inernerit takutippaat.
25-nit 34-nut ukiullit akornanni siuariaatsit ukiut kingulliit 15-it ingerlaneranni killeqartut nalunaarusiami paasinarsivoq.
Taakkunanngami affaannaasa missaat meeqqat atuarfiannit naammassinermi kingorna ilinniaqqittarput.
Kisitsisit Tyrkiamut sanillersuunneqarsinnaapput, nunanullu ineriartorsimasunut sanilliukkaanni kinguarsimasorujussuuvugut. Nunani tamalaani aningaasaqarneq ineriartortitsinerlu pillugit suliniaqatigiiffiup OECD-p kisitsisaatai naapertorlugit nunat ineriartorsimasut akornanni 17 procentiinnaat meeqqat atuarfiata kingorna ilinniaqqinngitsoortarput.
Tamatumunnga pissutaavoq inuit 1980-ikkut aallartinneranni ilinniagaqarsimasut piginnaalersitsisumik ilinniarsimanerat pillugu paasissutissat tamatigut eqqortumik takutitsisarsimannginnerat.
Nunarpulli ataatsimoortumik tapiissutinik isumalluuteqarpallaarunnaassaguni ilinniartitaaneq matumani pingaaruteqarluinnartoq, Aningaasaqarnermut Siunnersuisoqatigiit siulittaasuata Torben M. Andersenip oqaatigaa:
- Siuariartortoqassappat ilinniartitaanerup malunnartumik pitsanngoriaateqarnissaa pingaaruteqarluinnarpoq. Ilinniartitaaneq pitsaassutsimigut qaffassaavigineqarpat nunap aningaasarsiornera pitsanngoriaateqartartoq nunani allani takoreerparput, Torben M. Andersen oqarpoq.
