Ilulissani toqutsinermut suliaq: Politiit toqunneqartup kinaassusaa saqqummiuppaat
![](/sites/default/files/styles/image_934x467/public/article_images/politi_i_ilulissat.jpg?itok=6T9O9RJ2)
Ilulissani ikuallaavimmi toqungasoq nassaarineqartoq tassaavoq Maassannguaq Dalager. 24-nik ukioqarluni toqukkut qimaguppoq.
Politiit misissueqqissaarnermi aqutsisuat, Jan Lambertsen, taama oqarpoq.
- DNA-mik misissuinitta inernera paasigatsigu ajortumiigaq Maassannguaq Dalageriusoq qularnata oqaatigisinnaavarput, Jan Lambertsen oqarpoq.
Pinerlineqartup kinaassusaa qanigisaasut isumasioqatigereerlugit avammut nalunaarutigigitsik, Jan Lambertsen erseqqissaavoq.
AAMMA ATUARUK Politiit: Qulaajarluinnalerparput
Misissuinermummi atatillugu taama saqqummiipput.
- Maanna ilisimasagut atussavagut, pineqartup ulluni ikuallaavimmi timaata ilaanik nassaarnissap tungaanut susimaneranut paasinninnissamut innuttaasut akornanni ilisimannittoqarnersoq apeqqutigisinnaaniassagatsigu, Jan Lambertsen oqarpoq.
Ilulissani ikuallaavimmi amiilaarnartumik sapaatip akunnera ataaseq sinnerlugu matuma siorna nassaartoqarpoq, taamani timip ilaanik nassaartoqarmat.
Politiit sapaatip akunnerani kingullermi tallimanngornermi ualilluarnerani nalunaaruteqarput inuit pingasut tigusarineqarsimasut.
Tigusarineqartunit ataaseq aqaguani iperagaaqqippoq, marlullu eqqartuussivimmi matoqqasumik arfininngornermi sassartinneqarlutik.
Eqqartuussivimmi sassartinneqarnerisa kingorna angut sapaatini akunnerni sisamani arnarlu ulluni pingasuni tigummigallagassanngortinneqarput. Arnarlu sapaammi iperagaavoq.
AAMMA ATUARUK Ilulissani timip ilaanik nassaarneq pillugu suliaq: Inuit arlallit Ilulissani tigusarineqartut
Jan Lambertsenip oqaluttuarisinnaanngilaa Maassannguaq Dalagerip tigusaasoq qanoq attuumassuteqarfigineraa.
- Ilisimasariittut kisiat oqaatigisinnaavara. Ilagiittut takuneqarnikuupput. Kammagiinnersut minnerusumilluunniit atassuteqarnersut maanna paasiniassavarput, tassanilu innuttaasunit ikiorneqarsinnaavugut, Jan Lambertsen oqarpoq.
Toqutsinermut pissutaasup paasinissaanut sumut killippisi?
- Paasiartoripput taamaallaat oqaatigisinnaavara. Toqutsinermulli suna pissutaasinnaanersoq pillugu paasiniaarnermi innuttaasunit ikiorneqarnissarput pisariaqartipparput, oqarpoq.
AAMMA ATUARUK Ilulissani ikuallaavimmi eqqumiitsorsiaq pillugu politiit: Maanna toqutsisoqarsimanera pillugu paasiniaavugut
Politiillu pinerlineqartup ikuallaavimmi timaata ilaanik nassaarnissap tungaanut susimaneranut paasinninnissamut innuttaasut akornanni ilisimannittoqarnersoq maanna tusarusuipput.
- Pinerlineqartup timaata ilai ikuallaavimmi nassaarineqarnerisa tungaanut illoqarfimmi angalaarsimaneranik, iliuuserisimasaanik susimaneranik ilisimasaqartut tusarfigerusoqaavut. Aamma politiinit tusarneqareersimassasorigaluaraanniluunniit, arlaleriarlugit tusarnissaat tusanngitsoornissaannit piumaneruarput, Jan Lambertsen oqarpoq.
Kalaallit Nunaanni Politiit 70 14 48-mut attavigineqarsinnaapput.