Politiit: Qulaajarluinnalerparput

Ilulissani politiit toqutsisimasorisartik marluk tigusaraat.
- Suliap misissuiffiginera qulaajaliivipparput, misissueqqissaartartut pisortaat, Jan Lambertsen oqarpoq. Assi © : Malik Brøns
oktobarip 09-at 2021 15:04

Ilulissani toqutsisoqarsimaneranut suliamut saassaagut, maanna inuit marluk toqutsinermut attuumassuteqartut politiinit tigusarineqarput.

Inuit marluk tigusarineqartut Ilulissani eqqartuussivimmi ualimut pingasunut killisiorneqassapput.

AAMMA ATUARUK Ilulissani timip ilaanik nassaarneq pillugu suliaq: Inuit arlallit Ilulissani tigusarineqartut

Misissueqqissaartartut pisortaat, Jan Lambertsen KNR-imut oqarpoq.

- Qulaajaanerput tamakkiisoq anguliivikkipput isumaqarpunga. Inuilli pisimasumut attuumassuteqartut nassaarereeratsigit, qanoq pisimasoqarnera tamakkiisumik paasingajalerparput.

Misissueqqissaarnerli suli ingerlanneqarmat, eqqartuussivimmi killisiuineq matoqqasumik ingerlanneqassaaq.

Toqutaasoq suli kinaassusersineqanngitsoq

Toqutsisimasutut pasisat marluupput, taakkulu tigusarineqareerput, allamillu pasisaqaratik, Jan Lambertsen oqarpoq. Toqutaasimasullu kinaassusersinissaa aamma qanillattoritsik misissueqqissaartartut pisoraat KNR-imut ilisimatitsivoq.

- Pinerlineqarsimasumut atatillugu, kinaanera 100 procentimik eqqortumik paaserusukkaluarparput, kisiannili sananeqaatai DNA-t misissorneqareertinnagit kinaanersoq eqqartuussivimmi saqqummiunneqarsinnaasumik qularnaavissorlugu oqaaatigisinnaanngilarput.

Qanigisaasut ilisimatinneqareerput.