Eqikkaaneq: Sakkortuumik oqaluttoqarnera pissutigalugu oqallinneq taamaatiinnarneqartoq
Ataasinngornermi oqallisigisassat arlaqaraluarput, sakkortuumilli oqaluttoqarmat oqallinneq taamaatiinnarneqarpoq. Naleqqamiit Aki-Mathilda Høegh-Dam aamma Inuit Ataqatigiinniit Ane Hansen sakkortuumik oqqatereersullu tamanna pivoq.
Aki-Mathilda Høegh-Damip Nunavut nunattalu naalakkersuisuini inatsisartuinilu pisortatigoortumik suleqatigiissitaliortoqarnissaanik siunnersuuteqarnerata nalaani pivoq.
Siunnersuut naalakkersuisooqatigiinnit tamanit itigartitsissutigineqarpoq.
Naalakkersuisooqatigiinni partiit nunarput nunani allani suleqatigiissitaqareernerarpaat, nutaanillu pilersitsinnginnermit suleqatigiissitaareersut ukkatarineqarnissaat isummiullugu.
Saniatigut Nunatta Nunavuullu akornanni suleqatigiinnerusoqarnissaanik suliaqartoqareersoq taakku isumaqarput.
Múte B. Egedep (IA) Aki-Matilda Høegh-Dam (N) sinnerluni oqaaseqaqattaaginnartoq oqaatigimmagu Høegh-Dam Egedelu aamma isumaqatigiinngilerput.
Múte B. Egede naalakkersuisullu siunnersuummut aamma itigartitsipput.
'Assingusumik nalaataqarsimanngisaannartoq'
Múte B. Egedep Nunavummi naalakkersuisut inatsisartulluunniit siunissami suleqatigerusunnerlugit toqqaannartumik oqaatigerusunngilaa. Aki-Matildap tamanna itigartitsinertut isigaa, tamannalu pissutigalugu taakku akornanni sivisuumik oqallittoqarpoq.
Aki-Matilda Høegh-Dam (N) aamma Ane Hansen (IA) aamma oqqatilerput, Aki-Matilda Høegh-Dam Ane Hansenimit ilaatigineqarsorivoq.
Ana Hansen Aki-Matilda Høegh-Damimut apeqquteqarnermi illarnani qungujussimanerarami Aki-Matilda Høegh-Damimit unitsinneqarpoq.
Tamanna pissutigalugu oqallinnermi aqutsisoq, Per Berthelsen oqallinnermut akuliuppoq, taassuma ataqqinnittoqarnerunissaa Inatsisartunilu ilaasortani inuit pineqannginnissaat noqqaassutigaa.
Ullormut oqaluuserisassani allat marluk oqaluuserineqartussaagaluarput, Per Berthelsenilli Aki-Matilda Høegh-Damip siunnersuutaa oqaluuserisassani kingulliussasoq oqaatigaa.
Per Berthelsen Facebookikkut allappoq:
- Ullumi inatsisartuni ataatsimiinneq aqutsivigisara aatsaat taamak avaanngusunnermik annertigisumik misigisaqarfiuvoq. Ileqqorlunneq takusara ukiuni katillugit ukiut 22 misilittagaqareerlunga kiinaanngulaarnartigalunilu peqqusiileqinartigisoq aqqusaarpara. Nuanninngilluinnarpoq utoqqatsissutigisariaqaraluarlunilu. Tamannali pissasoq qularaara.
Taamaammat immikkoortut sinneruttut, inuusuttut akornanni pinerluuteqartarneq pillugu oqallinnermik ilaatigut tunngassuteqartussat ullumikkumut kinguartinneqarput.
