USA-p naalakkersuisuisa Kalaallit Nunaannik soqutigiinninnerat nunap isumannaatsuunissaanut taamaallaat tunngassuteqarpoq.

USA-p nunanut allanut ministeria, Marco Rubio,tv-qarfimmit Fox Newsimit  marlunngornerup unnuaani apersorneqarluni taama oqarpoq.

- Kalaallit Nunaat pillugu apeqqut, nunap tiguarneqarnissaanut tunngaveqarnani inuiaat isumannaatsuunissaannut tunngaveqartoq, præsidentitta erseqqissarpaa, Marco Rubio oqarpoq.

USA-p, Danmarkip Kalaallit Nunaatalu Kalaallit Nunaat pillugu isumaqatigiissuteqarnerisa kingorna nunanut allanut ministeri sapaatip akunnerani kingullermi apersorneqarpoq.

USA-p præsidentiata Donald Trumpip, Kalaallit Nunaata pisiarinissaanik piumasaqareernerata kingorna isumaqatigiissut atsiorneqarpoq.

Trumpip siorna oqaatigaa, Kalaallit Nunaat USA-mut ilanngussinnaagaa.

Pissutaasut marluusut

Isumaqatigiissut, sapaatip-akunnerani kingullermi atsiorneqartoq tunngavigalugu, USA-p Narsarsuarmi Mestersvigimilu sakkutooqarfiliornissaa Pituffimmilu sakkutooqarfimmik alliliinissaa akuersissutigineqarpoq.

Isumaqatigiissutip aamma Amerikamiut Kalaallit Nunaanni rakettinik Golden Domemik illersuusiornissaannut periarfissiivoq.

Saniatigut naalagaaffiit imaluunniit naalagaaffiit Natomi EU-miluunniit ilaasortaanngitsut, isumaqatigiissut naapertorlugu, suliassaqarfinni, sunnertiasutut taaneqartartuni, sunniuteqartinneqassanngillat. 

Marco Rubiop Fox Newsimit apersorneqarami nunarput, marlunnik peqquteqarluni, ullumikkut aatsaat taama pingaaruteqartigisutut oqaatigaa. 

Rubiop oqarneratut nunat arlallit, ilaatigut Kina, angallavissanik nunani tamalaani niuernermut umiarsuillu angallannerannut pingaaruteqartut aqutserusupput. 

- Pissutaasup aappaa tassaavoq silaannarsuarmi sorsunneq.

- USA-p illersorniarluni missilinik illersuusiussappat, Kalaallit Nunaat pingaaruteqartorujussuuvoq, Marco Rubio oqarpoq. 

Siunertarisat allat

Nunanut allanut ministerip USA-p atorfilittaasa akeraasinnaasut aningaasaliissuteqarnermikkut, assersuutigalugu mittarfiliorsinnaanerat, piviusumilli allatut atorneqartussiamik sanasinnaanerat ernumassutigigaat oqaatigaa. 

- Umiarsualivittut mittarfittulluunniit ittuusinnaasinnaavoq, kisiannili piviusumik sakkutooqarfiusoq, Marco Rubio oqarpoq. 

USA-p, Danmarkip nunattalu isumaqatigiissutaat sapaatip akunnerata siuliani marlunngornermi atsiorneqarpoq, kingornalu nunatsinni Danmarkimilu inatsisartuniit akuerineqassalluni. 

RITZAU