Jens-Frederik Nielsen nunani tamalaani nersornaasiunneqartartumik nersornaaserneqartoq: ‘Nunarsuup aaqqissuussaanera illersussavarput’
Piffissami sorsuffiusumi nunanilu tamalaani akerleriittoqartillugu, oqaloqatigiittoqarnissaanik, ataqqinninnissamik namminiussuseqarnissamillu anguniagaqartunik aqutsisoqartariaqarpoq.
Spaniami tusagassiorfiup La Vanguardiap nunani tamalaani nersornaasiuttakkaminik naalakkersuisut siulittaasuannik Jens-Frederik Nielsenimik (D) ukiumut nersornaaserneqartussatut toqqaasup oqariartuutigaa.
Jens-Frederik Nielsen Barcelonami Premios Vanguardiamik nersornaasiinermi nersornaammik Premio Vanguardia Internacionalimik ataasinngornermi unnukkut nersornaaserneqarpoq.
Jens-Frederik Nielsen scenemut arsarnernik kalaallillu illuinik qalipaatigissunik tunuliaqutsersimasumut qaqivoq isiginnaartullu aalateriffigalugit, kingornalu Spaniap ministeriuneranit Pedro Sánchezimit nersornaammik tunineqarpoq.
- Nersornaat Kalaallit Nunaata siuttuanut tunniunneqarpoq, taassumami Kalaallit Nunaata namminiussuseqarnera illersorsimavaa isumannaallisaanerlu siunertaralugu USA isumaqatigiissuteqarfigisimallugu, taama højtalerikkut oqartoqarpoq.
Spaniamiut tusagassiorfiata tusagassiissuteqarneratut Jens-Frederik Nielsen nunatta namminiussuseqarnerata nunanilu tamalaani inatsisit illersorsimaneranik kiisalu nunatta qaammatini kingullerni tatisimaneqarnerani silatusaarnerminit eqqissisimanerminillu nersorniarneqarpoq.
Nunallu tamalaat akornanni aaqqissuussaaneq nersornaasiinermi oqalugiarnerani, aviisip allaaserinninnera naapertorlugu, qitiuvoq.
- Nunarsuarmi aaqqissuussaaneq tamanna, sorsunnersuup aappaata kingorna pissutsit tunngavigalugit pilersinneqartoq nunallu tamalaat akornanni inatsisit atuuttut namminersortuunerlu tunngavigalugit atuuttoq illersussavarput. Nunarsuaq taamaaliornikkut akerleriiffiunnginnerussaaq, Jens-Frederik Nielsen oqalugiartarfimminit oqarpoq.
Nersornaasiineq Kalaallit Nunaata, Danmarkip USA-llu Issittoq pillugu, oqaluttuarisaanermut pingaarutilimmik USA-mullu tunngatillugu ajornartoornermut maannamut aaqqiissutaarpasittumik isumaqatigiissuteqarneranit, sapaatip akunnerani tulliuttumi pivoq.
Jens-Frederik Nielsenip oqarnera naapertorlugu, ataqqeqatigiinneq oqaluunnerlu atorlugit aaqqiissutissarsisinaasoqarnera isumaqatigiissummit ersersinneqarpoq.
Taassuma spanskit tusagassiortuinut oqalugiaammini, isumaqatigiissut illuatungeriit pingasut akornanni killissaliussatut Kalaallit Nunaannut, Europamut, USA-mut NATO-mullu pingaarutilittut oqaluuserivaa.
'Kalaallit Nunaanni illuatungeriinni sanngiinnerusoq'
La Vanguardiap Nielsen nunanit tamalaanit qaammatini kingullerni tatisimaneqangaatsiarnermik suliaqarsimasoq oqalugiaammini erseqqissaatigaa.
Nielsen nunatta aarlerinartorsiorneranik isertuussinani killiliussanik nunallu qanoq isumaqarneranik illersuinermini eqqissisimalluinnartumik takutitsisimasoq, aviisip allaaseraa.
Jens-Frederik Nielsenip Kalaallit Nunaat isumaqatiginninniarnermi sanngiinnerusumik inissisimasoq ilisimaarigaa, aviisip tamatuma saniatigut erseqqissaatigaa.
La Vanguardiap Jens-Frederik Nielsenip timersortartutut tunuliaqutaqarnera eqqissisimasumik saqqummertarneranut pissutaasinnaanerarpaa, tamannalu USA-mut isumaqatiginninniarnerit iluatsilluartumik naammassineqarneranut iluaqutaasimanerarlugu allallugu.
Jens-Frederik Nielsenip nersornaat kalaallit innuttaasut sinnerlugit tigullugu nammineq Facebookikkut allappaa.
Nersornaat kalaallit innuttaasut tamat oqartussaaqataanerannik namminerlu aalajangiisinnaatitaanissaminnik aalajangiusimanerannik nersorinninnerusoq Facebookimi saqqummersitamini ataasinngornermi unnukkut allappaa.
- Tamanna pissusissamisoorpoq, taanna allappoq.
Taassuma qaammatini kingullerni suliaqarneq pissutigalugu nunarsuarmi angalasarsimalluni nunarpulli sinnerlugu suliaqartuaannarluni ilanngullugu erseqqissaatigaa.
- Nunarsuarmi sumiikkaluaruma Kalaallit Nunaat inuiaallu kalaallit sinnerlugit suliuaannassaanga, Jens-Frederik Nielsen oqarpoq.
