Nunatsinni sumiiffinni arlalinni nioqqutissat amigaataasut

Pisiniarfimmi ilisiviit imaarupput, nillataartitsivinni ilisiviit aamma imaarupput, pisiassallu akitsoriartorput. Nunatsinni innuttaasut sumiiffinni arlalinni, nioqqutissanik amigaateqarneq pissutigalugu taama inissisimasoqarpoq.

-Pisiniarfippununa imaqanngiivissungajakkami taavalu amigaaterpaalussuaqarluni, nillataartitsivissuaq imaqanngilaq, taavalu ilai aamma imaqarnatik. Naatitat yoghurtit taavalu meeqqanut tulluarsinnaasut nerineqarsinnaasut, taakkuninnga imaqartaraluarpoq., Qaanaami najugalik Akatanguak Kaerngak oqarpoq.

Nioqqutissanik amerlasuunik amigaateqarneq peqatigalugu aamma pisiassat akitsoriartorput, nioqqutissat umiarsuarmik assartorneqarnatik timmisartukkut tikisinneqartariaqalermata.

 Akatanguak Kaerngak oqaluttuarpoq umiarsuit katillugit pingasut illoqarfimmut aasaanerani tikissimasut.

-Umiarsuaq siulleq tikimmat naatitanik tikittoqanngilaq, aappassaani ikittuarannguit tikipput. Massakkut kingulleq tikittoq, naatitaalunnguanik tikittoqaraluarpoq. Amerlagisassaanngillat. Siornatigumut sanilliullugu soqarpianngilaq.

Nioqqutissanik amigaateqarneq pillugu Akatanguak Kaerngak KNR-imut oqaloqateqarnermini ersarissumik naammagittaalliorpoq.

KNR-ip Qaanaami innuttaasut naammagittaalliuutaat KNI-mut saqqummiuppai.

KNI-mi attaveqaqatigiinnermut piujuartitsinermullu pisortaq Juliane Henningsen Heilmann, nioqqutissat Qaanaamut tikereersimasut, niuertarfimmili sulisussaaleqineq pissutigalugu nioqqutissanik ammarterineq sivitsorneqarsimasoq nassuiaavoq.

-Nillataartitsivinniittunut tunngatillugu Pituffimmut nioqqutissanik nassiussisarneq aallarteqqinneqassasoq isumaqatigiissutigineqarsimavoq, taanna ilisimatitsivoq; nangillunilu:

-Ukiup ingerlanerani Ilulissaniit timmisartumik nioqqutissanik nassiussisoqarnissaa pisariaqarsinnaammat, aamma taamatut nioqqutissanik pilersorneqarsinnaanissarput naatsorsuutigaarput, Juliane Henningsen Heilmann allappoq.

Tasiilami aamma ajornartorsiutaasoq

Qaanaamiinnaanngitsoq nioqqutissanik pisiniarfimmi ilisivinnit ukiukkut pisisinnaaneq ajornarsinnaasarpoq.

Tasiilami aamma nillataartitsivinni ilisiviit pisiniarfinnilu ilisiviit imaqannginnerat iluarineqanngilluinnarpoq.

Tamanna pissutigalugu illuatungiliuttut partiit marluk KNI-mit Naalakkersuisuniillu iliuuseqartoqarnissaa piumasaraat.

Partiimit Siumumit tusagassiuutinut nalunaarummi septembarip ulluisa 23-anni nassiunneqartumi ilaatigut ima allassimavoq:

– Siumup piumasaraa KNI Pilersuisoq Naalakkersuisullu piaartumik Tasiilamut ukiuunerani pilersuineq pillugu nassuiaateqassasut, peqatigisaanillu uppernarsarlugu, nunaqarfinni allanut ukiuunerani sikuusarnerata umiarsuakkut assartuinermik killilersuisarnerani imaluunniit unitsitsisarnerani pilersuineq qanoq qulakkeerneqarsimanersoq paaserusunneqarpoq.

Siumup suli akissutisinnginnera, Siumup eqimattaani ilaasortaq Lars Poulsen KNR-imut ilisimatitsivoq.