Ilinniartitsisussaaleqineq: - Ilikkagassaraluagut annaasarpagut
- Ilikkagassaraluagut annaasarpagut, Tasersuup Atuarfiani atuartut sinniisaanni ilaasortaq Adina G. Jakobsen oqarpoq.
Kommune Kujalleq ikinnerpaamik 17-inik ukiup atuarfiusup augustimi aallartinnissaannut ilinniartitsisussarsiorpoq.
Narsap Atuarfia ilinniartitsisunik arfineq marlunnik amigaateqarpoq, Nanortalimmi tallimanik amigaateqarput Qaqortumilu tallimanik amigaateqarlutik. Ilinniartitsisutullu atorfiit taakku inuttassarsiuunneqarput.
AAMMA ATUARUK Folkeskolen mangler lærere
Ilinniartitsisussaaleqinerlu atuartitsinernut akornutaasut, Adina G. Jakobsen oqarpoq.
-Sapaatip akunneranut marloriarluta pingasoriarlutaluunniit friikulasinnaasarpugut ilaanikkut. Ilaatigut atuaannavittarpugut. Assigiinneq ajorpoq, Adina G. Jakobsen oqarpoq, nangillunilu oqarluni, atuanngitsuukulanerup ilinniaqqinnissamut kinguneqarsinnaanissaa ernummatigalugu.
-Ilungersunaqaaq 10. klassiulluni ingammik. Aasamut naammassisussaalluni, atuarfimmullu allamut ingerlariaqqittussaalluni karakteerigut, soorlu tamakkua pinerullugit erloqinaqaaq.
AAMMA ATUARUK Ilinniartitsisussaaleqineq angusat pitsaannginnerinut pissutaavoq
Atuartullu annerit ilinniartitsisussaaleqinermit sunnerneqarnerusartut Tasersuup Atuarfiata siulersuisuisa siulittaasuat, Laila Lund isumaqarpoq. Siulersuisut ajornartorsiut eqqumaffigigaat taanna oqarpoq.
- Oqaluuserisarparput. Aamma ukiup ingerlanerani ilinniartitsisunik amigaateqarneq pissutigalugu arlaleriarluta ataatsimiittarpugut, ilinniartitsisunik atorfinitsitsinissaq pillugu, Laila Lund oqarpoq
AAMMA ATUARUK Ilinniartitsisut nukittuffigisatik tamakkiisumik atunngilaat
Ilinniartitsisunillu atorfissaqartitsipput. Ilinniartitsisooreersut ulapereerput, qaavatigullu suliakkersorneqartariaqanngitsut Laila Lund isumaqarpoq.
- Ilinniartitsisut ikippallaalerpata soorunami tiiminik tunioraannaraluaraanni aamma ilinniartitsisut piffissaarutissagamik atuartitsinissaminnut piareersarnissamut., Tasersuup Atuarfiata siulersuisuisa siulittaasuat, Laila Lund, oqarpoq.
Kommune Kujallermi meeqqat atuarfiini ilinniartitsisussaaleqisoqartuarnera iliuuseqarfiginiarlugu, Nanortalimmi, Qaqortumi, Narsamilu atuarfinni pisortat ilinniartitsisunngornianut pilerisaariartussallutik ilaatigut pilersaarutigaat.
AAMMA ATUARUK Periarfissat atorluarneqanngillat