Ilinniartitsisussaaleqineq angusat pitsaannginnerinut pissutaavoq
- Angusat amerlanerpaat karaktterilersueriaatsimi qeqqaniipput imaappoq angusat naammaginarlutik. Angusarissaarluartut amerlavallaanngillat, naqqaniittullu annertuginartutut isigineqarsinnaallutik.
Meeqqat atuarfiini ilinniartitsisut kattuffianni, IMAK-imi siulittaasoq Sivso Dorph taama oqarpoq.
Taassuma ilanngullugu oqaatigaa, angusat pitsaanerusinnaalluartut. Angusalli ataatsimut isigalugit pitsaasutut oqaatigineqarsinnaannginnerunut, atuarfiit tamanna akisussaaffigaat, Sivso Dorph oqarpoq.
- Taama angusat pitsaannginnerinut pissutaasimanerluni ilinniartitsisussaaleqisoqarsomasooq? Imaluunniit allamik sumik peqquteqarsimasinnaavaa? Sivso Dorph aperivoq.
Atuartut angusaasa pitsaasutut isigineqarsinnaannginneri arlalinnik nassuiaatissaqartoq, Sivso Dorphip aamma oqaatigaa.
- Aamma nalunngilarput, Atuarfitsialaap sanngiiffigigaa, meeqqat immikkut pisariaqartitsisut soorlu naqinnernik ilisarinnissinnaanngitsut imaluunniit atuarniarnermik ajornartorsiuteqatut ikiorsiiffigineqarnissaannut amigaateqarpugut. Illuatungaatigullu pikkorissut annerusumik unammilligassaqarnissaat amigaatigaarput, Sivso Dorph oqarpoq.
Meeqqat atuarfiini angusat pitsaanerulernissaannut suut aqqutaassanersut, Meeqqat Atuarfiini Ilinniartitsisut kattuffiata siulittaasuata, ukuusinnaanerarpai.
- Siulliullugu qanoq iliuuseqarfigineqartussaq isumaga malillugu uaniippoq, ilinniartitsisup pikkoriffigisai tunngavigalugit misilitsitsiffiusussani taassuma atorneqartarnissaa. Assersuutigalugu kalaallisoortitsinermi ilinniartitsisoq kalaallisut piginnaaneqarluartoq soraarummeersitsinermi atorneqartussaagaluarluni. IMAK-ip siulittaasua, Sivso Dorph taama naggaasiivoq.