Ilinniartitsisussaaleqiuarsinnarpugut
Kommune Kujallermi ilinniartitsisut 16-it amigaataasut, Qaasuitsup Kommuniani illoqarfinni 25-t missaanniittut amigaataapput.
Nunaqarfinnili ilinniartitsisut qassit amigaataanersut, Qaasuitsup Kommuniata ilisimanngilaa.
AAMMA ATUARUK Avinngarusimanerusuni ilinniartitsunik atorfinititsiniartarneq ajornakusoortoq
Pitsaasumik atuartitsinissaq qulakkeerniarlugu Qaqortumi Tasersuup Atuarfiani 7. klassit ataatsimut kattunneqartariaqarsimapput.
-Vikareqaannangajannikuugamik. Novembarimi decemberimilu ilinniartitsisoqariarlutik, januaarimiit maannakkumut vikariinangajannik aamma ilinniartitsitsoqarnerat illersoruminaatsillugu taamak aalajangertariaqarsimavugut, atuarfiup pisortaa Bettina A. Hansen oqarpoq.
AAMMA ATUARUK Ilinniartitsisut ikorfartorneqartariaqarput
Kujataani avannaanilu ilinniartitsisussaaleqineq Ilinniartitsisut Kattuffiata IMAK-ip ilisarisinnaavaa.
Ajornartorsiullu nuna tamakkerlugu atuummat suleqatigiinnikkut aaqqiissutissanik ujartuisoqartariaqartoq, IMAK-imi siulittaasoq Karl-Frederik Danielsen isumaqarpoq.
- Isorliunerusut pinngitsooratik ilinniarsimasunik ilinniartitsisoqarnissaat pingaaruteqarmat tamatta suleqatigiilluta taanna ingerlattariaqarparput, IMAK-imi siulittaasoq Karl-Frederik Danielsen oqarpoq.
