Naliliisarfik: Ilinniartitsisut ikorfartorneqartariaqarput
Assersuutigalugu atuartunut ataasiakkaanut naleqquttumik ilinniartitsisinnaanissamut ikorfartugassaaqisut, misissuisimasut naliliipput. Tassalu Inerisaavik akisussaasullu allat suliassaqaqisut, Naliliisarfimmiit oqarput.
- Atuartut ataasiakkaat piginnaasaat aallaavigalugu atuartitsineq qanoruna paasisariaqartoq? Taanna qanoq ittuuneranik ilinniartitsisut ilaat erseqqissumik paasisimanngilaat, meeqqat atuarfiat pillugu Naliliisarfimmi pisortaq Ellen Jensen Karlsen oqarpoq.
AAMMA ATUARUK Nalunaarusiaq: Kalaallisut atuartitsineq naammaginanngitsoq
Misissuineq, naliliinermut tunngaviusoq, ukiunik arfineq-marlunnik qanganisaassuseqaraluartoq, Naliliisarfiup ilinniartitsisunik attaveqartarneratigut misissuinermi paasisatik ullutsinni suli atuuttut, pisortaq erseqqissaavoq.
Ilinniartitsisullu ikinnerpaamik marlutsigut ajornartorsiuteqartut, Ellen Jensen Karlsen oqarpoq.
AAMMA ATUARUK Pitsanngoriaateqarnissamut periarfissaqarpoq
Ilinniartitsisut ikittuinnaat kalaallit oqaasiinik atuartitsinissamut pilersaaruteqarlutik atuartitsisarput. Taavalu aamma:
- Atuartitsissutit akimorlugit atuartitsiniaraanni suunukua aporfigineqartartut aamma suunukua unamminartittaraat? Tassani aamma tikipparput tassuunakkut ikorfartorneqarnissaat pisariaqartoq, pisortaq oqarpoq.
Ilinniartitsisut aamma kalaallit oqaasiinik atuartitsissutinik amigaateqartut, nalunaarusiami ilaatigut ersersinneqarpoq.
Misissuineq killiffimmik misiliutitut nalilersuinerusoq, nalilersuiffimmiit oqaatigaat. Misissuinermi illoqarfinni atuarfiit sisamat nunaqarfinnilu atuarfiit marluk aallaaviupput.
Nalunaarusiaq uani atuaruk.