Ilinniartitsisut nukittuffigisatik tamakkiisumik atunngilaat

- Tassa Nunarput tamaat ataatsimut isigissagaanni, liniefageqarfigalugu atuartitsiffigisat 43 procentiisa missaanniipput. Kisianni uagut misissuinitsinni akissuteqartut tunngavigissagutsigik, takusinnaavarput taakkunanngarniit appasinnerusussaasut, immaqa 40 procentiisa missaasa, inulaarluguluunniit, liniefageqarfigalugu atuartitsivigisarpaat, Sivso Dorph oqarpoq.

Tamanna atuartut angusalunnerannut pissutaaqataasoq IMAK-ip siulittaasua oqarpoq.

- Aamma isumaqarpunga misissuinerup takutikkaa ilinniartitsisut nukittuffigisatik tamakkiisuunngitsumik atoraat. Aamma isumaqarpunga ilinniartitsisut nukittuffigisatik tamakkiisumik atoraluarpatigik atuartitatsinnut tunniussinnaasavut aamma annertunerujussuussagaluartut, Sivso Dorph oqarpoq.

Nunatsinni ilinniartitsisut 87 procentii oqaatsitsigut atuartitsissutigisaminni ataatsimi arlalinnilluunniiit pikkorissarnissamik pisariaqartitsillutik IMAK-ip misissuinerani akissumminni oqarput.

2010-miit 2011-mut ilinniarnermi ilisimatusarfiup Nunatsinni meeqqat atuarfiani ilinniartitsissutissatut neqeroorutai pitsaanerusariaqartut Sivso Dorph oqarpoq.

- Ilinniarnermi ilisimatusarnermut institutip neqeroorutai qiviarutsigik, tassani neqeroorutigineqartut annikitsuarakasiupput, ilinniartitsisut piumasaqaataaninngaanniit appasinnerujussuullutik. Imaappoq, neqeroorutigineqartut ilinniartitsisut angorusutaaninngaanniit annikippallaarujussuarput. Assersuutigiinnarlugu, liniefageqartuni qallunaatut, tuluttut, matematikimi fysikimilu amigaateqarpugut. Taakkua annertuumik pikkorissaaffigineqartuugaluarpata aamma Nunatsinni taakkunani atuartitsivissani angusaqartitsisinnaanerput qaffasinnerujussuarmik kivissinnaanngussagaluarparput.