Politikki

Lars-Emil: Ikinnerussuteqartunik naalakkersuisoqarneq ajunngitsuusoq

Kim Kielsen naalakkersuisunut ikinnerussuteqartunut siuttuni siulliulinngilaq. Siumummi ikinnerussuteqartunik naalakkersuisunik 1983-imi pilersitsivoq. Taamalu naalakkersueriaaseqarneq tamat oqartussaaqataanerannut pitsaasuusoq, taamani Naalakkersuisunut ilaasortaq, Lars-Emil Johansen isumaqarpoq. Ikinnerussuteqarlutilli naalakkersuisut siulliit sivikitsuinnarmik atuupput.

Allattoq Ivik Kristiansen, Ane-Marie Petersen

oktobarip 10-at 2018 14:20

Naalakkersuisut ikinnerussuteqartut siulliit Siumumit 1983-imi pilersinneqarput. Atassulli Inuit Ataqatigiillu tatiginninnginnermik 1984-imi taasimmata, uppitinneqarput.

- Taamanili, immaqa oqartoqarsinnaavoq, tamanna politikkikkut ingerlatsinermi piviusunngorpoq, aamma najoqqutareqqissaartariaqagaq, Inatsisartuni ikinnerussuteqarnaveersaarluni ingerlatsinissaq, Lars-Emil Johansen oqarpoq.

Tamat oqartussaaqataanerannut ajungitsuusoq

Ikinnerussuteqartunik naalakkersuisoqaleqqinnera iluaraa.

- Isumaqarpunga demokrati eqqarsaatigalugu ajunngivissoq, aamma ikinnerussuteqarluni naalakkersuisuutitaqarneq. Suleqatit akornanni ajunngitsumik suleqatigiittoqarpat, ataqqeqatigiittoqarpat aammalu inuttut qanittumik imminut pissuseqartoqarpat, Lars-Emil Johansen oqarpoq, nassuiaallunilu.

- Naalakkiiginnartoqarsinnaanngilaq, imaluunniit partii ataaseq isummani kisiat malillugu ingerlaannarsinnaanngilaq. Kisianni suleqatigiit isummatik qanillattorlugit ataatsimoortittariaqarpaat, Naalakkersuisut ingerlassappata, Lars-Emil Johansen oqarpoq.

AAMMA ATUARUK Demokraatit naalakkersuisooqatigiinnissamut itigartitsipput Kielsenili tapersersorlugu

Pissutsinik akuersisariaqartut

Ikinnerussuteqarlutik naalakkersuisoqatigiit Kim Kielsenip siuttuuffigisai Demokraatinit ikorfartorneqarput. Demokraatit ikorfartuinerminni pissaaneqartorujussuanngortut Ilisimatusarfimmi adjunki isumaqarpoq. Naalakkersuisullu siunnersuutissaat amerlanerussuteqartunit akuersissutigineqartarniassammata Naalakkersuisut siunnersuutimik Demokraatinut takuteqqaartarnissaat piumasarineqarsimasoq, Demokraatit siulittaasuat Niels Thomsen aviisimit Sermitsiamit apersorneqarluni oqarpoq.

AAMMA ATUARUK Demokraterne er i en magtfuld position

AAMMA ATUARUK Niels Thomsen vil godkende forslag fra Naalakkersuisut

Tassalu naalakkersuisoqatigiit suleqatiminnut isumaqatigiinniarluarsinnaasariaqarput.

Taamaattoqassappallu pissutsinik akuersisoqartariaqarpoq.

- Isumaqatigiinniarsinnaanerlu tassaavoq, isumaqatigiinngissinnaanermik akuersineq. Isumaqatigiinngissinnaaneq aatsaat akuerigaanni taava isumaqatigiinniartoqarsinnaavoq. Imaattoqarsinnaannginnami, isumaqatigisinnaannginnatsigit uagut suleqatigisinnaanngilagut, Lars-Emil Johansen oqarpoq, nangillunilu oqarluni:

Demokraatit periarfissatuaanngitsut

- Naalakkersuisut periarfissaqarput, apeqqutini allani partiinik allanik isumaqatigiissuteqarniassallutik. Taamaalilluni immaqa oqarsinnaavugut, tamatigoornerujussuarmik naalakkersuinikkut ingerlatsinissamut periarfissaqartut. Kisianni taamatut ingerlatsissagaanni politikkikkut aqqorissuusariaqarpoq, Lars-Emil Johansen oqarpoq.

AAMMA ATUARUK Bent Måløvimiu sapaatit akunnerini pingasuni politikkikkut puullaaqititsisoq