Allaaserisaq nal. 12.29 nutarterneqarpoq.
Niels Thomsenip tallimanngornermi ullup qeqqanut oqaatigaa Kim Kielsenip Siumullu naalakkersuisunik ikinnerussuteqartunik pilersitsinissamut Demokraatinit kaammattuutigineqartoq.
Ikinnerussuteqarluni naalakkersuisoqatigiinnik pilersitsisoqassappat tamanna tapersersorniarlugu Demokraatit oqaatigaat, taamaaliornikkut Kielsenip qinersinissamik suaaruteqarnissaa pinngitsoortinniarlugu. Partiilli Siumut naalakkersuisooqatigerusunngilaa:
- Eqqissiviinneqalernissaa qanippallaarujussuarpoq. Siumut imminut aqussinnaalertariaqarpoq naalakkersuisoqatitut uppernassuseqalissaguni. Paarlattuanilli Demokraatini isumaqarpugut massakkut Inatsisartunut qinersinissaq inuiaqatigiinnut naapertuutinngilluinnartoq. Taamaattumik Siumut neqeroorfiginikuuarput naalakkersuisunut Siumumit siuttuuffigineqartunut amerlanerussusiisarnissarput isumaqatigiinniutigisinnaagipput, Demokraatit tusagassiorfinnut nalunaaruteqarlutik taama allapput.
Demokraatit erseqqissaatigaat Inatsisartut ukiaanerani ataatsimiinnerat pingasunngorpat aallartippat Kim Kielsenip naalakkersuisut siulittaasuattut tatiginnikkunnaarnermik taasissutigineqassappat tamanna taperserumanagu.
Kim Kielsen taamaalilluni Demokraatinit tapersersorneqarluni Naalakkersuisut siulittaasuattut ingerlaannarsinnaavoq.
Niels Thomsen tusagassiorfinnut nalunaarummini ilisimatitsivoq Demokraatit Siumullu mittarfiliortiternissaq pillugu inatsisissaq 'inuiaqatigiinnut tamanut akilersinnaasussaq' akuersissutiginiarlugu isumaqatigiissutigisimagaat. Tamannarpiarli qanoq isumaqarnersoq itisilerneqanngilaq.
