Niels Thomsenip Naalakkersuisut siunnersuutaat misissoqqaartarniarai

Naalakkersuisummi inatsisissatut siunnersuummik Inatsisartunut saqqummiussissagaangata Demokraatinit iluarsartuunneqaqqaartarsinnaavoq.

Niels Thomsen aviisimi Sermitsiami apersorneqarnermini taama oqarpoq, Kim Kielsenillu ikinnerussuteqartumik naalakkersuisuutitaqarnissaanut piumasaqaatitik ilaatigut oqaatigai.

AAMMA ATUARUK Ikinnerussuteqarluni naalakkersuisoqatigiinnermut isumalluartoq

- Naalakkersuisut suliatik Inatsisartunut akuerineqartussanngortillugit ingerlatinnginnerini taakku uagutsinnut ingerlaqqaartassasut (aamma aaqq.) piumasaraarput. Taamaalilluta Naalakkersuisut suliassanngortitaannik misissueqqaarnissarput qulakkeersinnaassavarput. Kissaatigisavut ilaasut takusinnaagaangatsigu siunnersuutip amerlanerussuteqarfiunissaa qulakkeertassavarput, Niels Thomsen aviisimut oqarpoq.

Niels Thomsenillu oqaatigaa Demokraatit naalakkersuisooqataalernissamut assigiinngitsorpassuit, soorlu mittarfinnut tunngasut, isumaqataaffigisinnaagaluaraat, Siumumili eqqissiviilliortoqarnera Demokraatit naalakkersuisooqataalerniannginnerinut pissutaavoq.

AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut