Kim Kielsen Ikinnerussuteqarluni naalakkersuisoqatigiinnermut isumalluartoq

Ikinnerussuteqarluni naalakkersuisoqatigeeqarneq nunatsinni nalinginnaasuunngilaq.

Kim Kielsenili naalakkersuisoqatigiit partiillu naalakkersuisoqatigiinnut ikorfartuisup Demokraatit suleqatigiinnissaannut isumalluarpoq.

Naalakkersuisut siulittaasuat Qanoruumut tallimanngormat taama oqarpoq.

AAMMA ATUARUK Kielsenip naalakkersuisooqatigiivi nutaat aajuku

- Soorunami nalilersuisaqattaarsimavunga, aamma ikinnerussuteqartunik naalakkersuisunik pilersitsinissaq maani nuatsinni taamanikkut nutaajummat, kisianni tamat oqartussaaqataanerannik ingerlatsinermi nutaajunngimmat. Tassami qallunaat nunaanni taama pissuseqaqattaarlutik ukiut hunnorujut ingerlapput. Taamaammat uagut maani nunatsinni aamma misilittariaqaratsigu. Soorunami Naalakkersuisut periarfissarititaat taakku assigiinngitsut oqimaalutareerlugit aalajangerpunga periarfissaq taanna tigusinnaassallugu, Kim Kielsen oqarpoq.

Partiinit naalakkersuisoqatigiinniittunit Inatsisartuni ilaasortat 13-iupput, tassalu amerlanerussuteqanngillat. Taamaammat Kim Kielsenip Demokraatinit, arfinilinnik Inatsisartuni ilaasortalinnit, ikorfartorneqarnissani pisariaqartippaa.

AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut

Kim Kielsenilu Demokraatinik suleqateqarnissaminut isumalluarpoq.

- Uani partii Demokraatit sulianut annertuunut assigiinngitsunut tunngatillugu tapertaaniarput. Taamatut oqariartuuteqarnerat tigulluarnikuuarput. Aamma taakkuupput, annertuumik kaammattuisut, ikinnerussuteqarlutik naalakkersuisunik pilersitsinissamut tunngatillugu misiliissasugut. Taamaammat sukkut suleqatigiissinnaanersugut qimerloorsimavarput, Kim Kielsen oqarpoq.

AAMMA ATUARUK Naalakkersuisut nutaat takukkit

Taassuma naalakkersuisut nutaat tallimanngormat saqqummiussai Inatsisartunit akuersissutigineqarput.