Pisut: Bent Måløvimiu sapaatit akunnerini pingasuni politikkikkut puullaaqititsisoq
Partii Naleraq sapaammi ualisoq naalakkersuisooqatigiinni politikkikkut puullaaqititsilerpoq. Hans Enoksenimmi tusagassiortunik katersortitsinermi oqaatigaa partiimi Kim Kielsenimit pineqarnini akuerisinnaajunnaaraa. Naalakkersuisut siulittaasuannit pissutsit pingaarutillit pillugit ilisimatinneqarsimanngillat, naak Partii Naleraq naalakkersuisuni marlunnik ilaasortaatitaqaraluartoq.
- Pissutsit ilungersunarsiartuinnarmata. Naalakkersuisooqatigiinni siuttut oqaloqatigiinneq-ajorpugut, Hans Enoksen oqarpoq, Partii Naleqqallu naalakkersuisooqatigiinnit tunuarnerata kingunerisaanik Kim Kielsen ikinnerussuteqalersillugu.
Enoksenip aamma oqaatigaa piffissami sivisuumi pakatsisimaarnertik taama kinguneqartoq. Tamannali ullunik marlunnik sioqqullugu Sermitsiaq.AG-mi allaaserisaq saqqummermat pisut killissartik tikippaat partiillu siulittaasuata naalakkersuisooqatigiinnit tunuarnertik nalunaarutigaa.
Mittarfiliornissanut atatillugu Lars Løkke millionilikkaanik. Allaaserisaq taama qulequtaqartoq Sermitsiaq.AG-p nittartagaani septembarip aallartinnerani tallimanngornermi ullaakkut saqqummersinneqarpoq.
Allaaserinnittoq tassaavoq freelancemik tusagassiortoq Bent Højgaard Sørensen. Attaveqarfigisanilu aqqutigalugit ministeriunerup Lars Løkke Rasmussenip nunatsinni naalakkersuisut mittarfiliortiternerit pillugit suliniutaannut aningaasaliissutissanik erniakitsunillu taarsigassarsititsiniarluni nunatsinnukartussanngornera siullersaalluni oqaluttuaraa.
Allaaserisani tusarfimminit 'qitiusumik inissisimasumit' sisamanngornermi septembarip arfernani uppernarsartinniarlugu suliaqarpoq.
- Attaveqarfigisartakkakka qaammatini arlalinni sianerfigisaqattaarpakka, tassanngaannarlu iluatsitsivunga, attaveqarfigisamami ilaata susoqalerneranik oqaluttuuppaanga.
AAMMA ATUARUK Partii Naleraq uani naalakkersuisooqataajunnaarpoq
KNR-imi Berlingskemilu tusagassiortuusimasup allaaserisani Ballerupip eqqaani Måløvimi illumini unnukkut inaarsarpaa, taannalu Sermitsiaq.AG-p nittartagaatigut ullaakkut saqqummersinneqarpoq.
- Partii Naleqqap naalakkersuisooqatigiinnit tunuarneranik kinguneqarnissaa ilimaginngilluinnaraluarpara, Bent Højgaard Sørensen oqarpoq.
Danskit ministeriunerannut isumaqatigiissutaasoq Kielsenimut iluatsitserujussuarnertut isikkoqaraluarpoq, isumaqatigiissuteqarnermimi Nunatsinni oqaluttuarisaanermi sanaartornermik suliniutit annersaata piviusunngortinnissaa qanilliallaqqinneqarmat.
Aamma naatsorsuutigisamit akikinnerujussuunissaa qulakkeerneqarpoq. Partii Naleqqalli, mittarfiliortiternissamut aallaqqaataaniilli qularinnittup, taamatut isumaqarfiginngilaa.
- Naalagaaffik politikkimut toqqaannartumik akuliuppoq, taamaalilluni kalaallit nammineersinnaanerat apeqquserneqarujussuarluni. Taannalu uagut peqataaffigerusunngilarput, nunatta namminersulivinnissaa ukiorpanngortuni anguniarparput, massakkullu taamaaliornikkut sanngiillisinneqartussaasugut takusinnaavarput. Taannalu uagut peqataaffigerusunngilarput, Hans Enoksen tusagassiortunik katersortitsinermi taama oqarpoq.
Partii Naleqqap naalakkersuisooqatigiinnit tunuarneranit videoliaq. Allaaserisaq videop ataatungaani nanginneqarpoq.
Danskit ministeriunerat Partii Naleqqap tunuarnerata aqaguani Nuummut tikippoq, Nuummilu Ilulissanilu mittarfiit Danmarkimit aningaasalersueqataaffiginissaat piginneqataaffiginissaallu pillugit isumaqatigiissut atsiorlugu. Atsioqatigiinnerullu peqatigisaanik Kim Kielsenimut Lars Løkke Rasmussenimullu akerliussutsimik takutitsinissamut Partii Naleraq qaaqqusivoq.
- Nunarput tunerusunngilarput! Peqataagit, qaaqqusissutimini taama allappoq.
Akerliussutsimilli takutitsinerup qanoq kinguneqarnissaa partiip naatsorsuutigisaanit allaanerugunarpoq. Akerliussutsiminnimmi takutitsisut arlallit Kielsen Løkkelu sakkortuumik suaartarfigaat. Naalakkersuisullu siulittaasuata kingorna qanoq tujormisimatiginerluni Facebookkikkut allaaseraa.
- Akerliussutsimik takutitsinermi ilaatigut annoraara peeqqullugu suaartarneqarpunga, tassagooq kalaaliunnginnama. Aamma allaat kaammattuisoqaraluarpoq politiinngooq najuuttut ikeqimmata ujaqqanik milloorneqassasunga. Aallaallumi nivinngagaanissannik oqaluttoqaraluarpoq. Uannut pissusilersuutigineqartut saniatigut ministeriuneq angerlaqqullugu suaartarneqarpoq, Kielsen taama allappoq misigisanilu sakkortusimanerarpaa:
- Soorunami kalaaliulluni allaat annoraaq peeqqullugu suaartarneqarluni misigissutsikkut attortinnarpoq. Annerinerpaasarali tassaavoq meeqqaat isiginnaartoralugit tusarnaartoralugillu pissusilersuutit taama ittut saqqummiunneqarmata, naalakkersuisut siulittaasuat oqarpoq.
Akerliussutsimillu takutitsisoqarnerani sakkortuuliutigineqartut akuerisinnaanagit Partii Naleqqap kingorna nalunaarutigaa.
Kim Kielsenillu tunuliaquttani partiillu illuatungiliuttut annerit marluk, Inuit Ataqatigiit Demokraatillu, Inatsisartunut upernaaq qinersisoqarnerata kingorna isumaqatigiinniarfigisani ulluni tulliuttuni oqaloqatigai. Isumaqatigiinniarnerilli taakku angusaqarfiunngitsoorput, Kim Kielsenilu naalakkersuisut 16-iinnarnik tunuliaqutaqartut siuttuuffigilerpai.
Kielsenilli isumaqatigiinniarnissaq ulapputigivallaanngilaa, Paamiummi eqqaannut aavariarpoq. Siumumi partiip allattaata Mikael Petersenip sisamanngornermi septembarip 13-iani nassuiaatigaa partiip siulittaasuata eqqarsarnissaminut kisimiilaarnissani pisariaqartikkaa.
Demokraatit Inuit Ataqatigiillu isumaqatigiinniarnissamut siunnersuutinik Kielsenip aavarnerani isummerfigisassaannik nassinneqarput.
Aatsaallu septembarip 21-ani Siumup partiit illuatungiliuttut marluusut naalakkersuisooqatigiinnik nutaanik pilersitsinissaq pillugu isumaqatigiinniarfigilerpai. Ullualuilli qaangiummata, septembarip 24-ani, Sara Olsvigip Inuit Ataqatigiillu nalunaarutigaat Kim Kielsenip Inatsisartuni annaanniarnissaa kissaatiginagu.
- Siumup siuttui massakkut aappassaat isumaqatigiinninniarfigisimalerpagut. Ersarissumillu inerniliussarput tassaavoq naalaarusussuseqarnermik, akuutitsinerusussuseqarnermik, isertuanngitsumik ammasumillu pissuseqarluni aqutsilluarnissamik sulissuteqarusussuseqartoqanngitsoq, partiip siulittaasua taama nassuiaavoq.
AAMMA ATUARUK IA partiinik allanik oqaloqateqarusuttoq
Olsvigip taamaalilluni Kim Kielsen amerlanerussuteqarluni naalakkersuisooqatigiinnik pilersitsisinnaanissaanut Niels Thomsen Demokraatillu periarfissatuanngortippai. Kielsenip Nunatta Qitornai, Atassut Demokraatillu peqataaffigisaannik naalakkersuisooqatigiinnik pilersitsinissaq iluatsissinnaappagu Inatsisartuni 19-inik amerlanerussuteqarnermik qulakkeerinniffiusinnaasoq.
- Demokraatit saattussaassavakka, neriuuteqarfigissavakkalu suleqatigiinnissamut periarfissamik peqassasoq, Naalakkersuisut siulittaasuat Kim Kielsen Inuit Ataqatigiinnut isumaqatigiinniarnerit kinguneqanngitsoortut kingorna taama oqarpoq.
AAMMA ATUARUK Partiit sisamat naalakkersuisoqatigiinniitikkusukkai
Siumulli siulittaasua isumalluaraluarluni Demokraatit naalakkersuisooqataalernissaat iluatsinngitsoorpaa. Septembarip 28-ani - Inatsisartut ukiaanerani ataatsimiinnerisa pilersaarutit malillugit aallartiffissaraluanni - Niels Thomsenip nalunaarutigaa Demokraatit Siumut naalakkersuisooqatigisinnaanngikkaat.
- Eqqissiviinneqalernissaa qanippallaarujussuarpoq. Siumut imminut aqussinnaalertariaqarpoq naalakkersuisoqatitut uppernassuseqalissaguni, Thomsen taama oqarpoq.
Demokraatilli Kielsenimik annaassisuupput. Niels Thomsen nassuiaavoq qinersisartut qaammatialuit qaangiutiinnartut qinerseqqinnissaat partiimi naleqquttuusorinngikkaa.
Taamaammat Kielsenimut neqeroorutigaat ikinnerussuteqarluni naalakkersuisooqatigiinnik pilersitsinissamut Demokraatit Inatsisartuni tunuliaqutaasinnaasut.
AAMMA ATUARUK Demokraatit naalakkersuisooqatigiinnissamut itigartitsipput Kielsenili tapersersorlugu
Siumullu siulittaasua eqqarsarfissaqarnissaminik pisariaqartitseqqilerpoq. Taanna tusagassiortunut oqarpoq ikinnerussuteqarluni naalakkersuisut siuttuuffiginissaannut nukinnik atuinissani piareersimaffiginerlugu nammineq ilaquttanilu isumaliutigeqqaartariaqaritsik. Naalakkersuisullu siulittaasuat sapaatit akunnerata naanerata ingerlanerani aalajangerpoq Demokraatit peqasiullugit ikinnerussuteqarluni naalakkersuisoqarnissaq aaqqiissutissat pitsaanersarigaat.
Sapaatit akunnerini pingasuni uivertoqarnera aallartinneratulli inerneqarpoq. Kielsen suli siuttuuvoq, tamannalu qanoq sivisutigisumik attassinnaassaraa apeqqutaaginnalerpoq.
AAMMA ATUARUK Naalakkersuisut nutaat takukkit
