EU-p USA-llu niuernikkut isumaqatigiissutaat pillugu Løkke: Tamanna uagut nammineq aalajangigassarinngilarput

Lars Løkke Rasmussenip (M) USA-mik niuernikkut isumaqatigiissut eqqortumik alloriarnerusoraa.
USA-p præsidentiata Donald Trumpip aamma EU-p ataatsimiititaliarsuata siulittaasuata Ursula von der Leyenip sapaatiummat Skotlandimi naapeqatigiinneranni isumaqatigiissut saqqummiunneqarpoq. Assi © : Evelyn Hockstein/Reuters/Ritzau Scanpix
juulip 28-at 2025 09:06

EU-p USA-llu sapaatiummat niuerneq pillugu isumaqatigiissutaat nunanut allanut ministerip Lars Løkke Rasmussenip (M) "nutaarsiassatsialattut“ taavaa. 

Isumaqatigiissutip, Europamiut nioqqutissaannut kiffartuussinerannullu USA-mut avammut tunineqartartunut 15 procentimik akitsuusiisussap, sukumiinerusumik paasissutissiissutigineqarnissaa utaqqiniarpaa. 

- Niuernikkut attaveqatigiinneq unammillernartuusimasoq sulilu unammillernartuusoq naluneqanngilaq, siumullu oqaatigineqarsinnaanngitsunik akitsuusiinernillu qaffasissunik siorasaarinermit eqqugaasimalluni, taamaattumik isumaqatiginninniarnerit sakkortuut saniatigut EU patajaatsumik qisuariarnissaminut piareersarnikuuvoq. 

 - Niuernermi pissutsit siornatigutut pitsaatigilernavianngillat, tamannalu uagut nammineq aalajangigassarinngilarput, kisianni pissutsit qajannaallisarumallugit illuatungeriillu akuerisinnaasaannik oqimaaqatigiissaarisoqartariaqarpoq, Lars Løkke Rasmussen allakkatigut oqaaseqaateqarpoq. 

Akitsuut affaannanngortoq 

USA-p præsidentiata Donald Trumpip aamma EU-p ataatsimiititaliarsuata siulittaasuata Ursula von der Leyenip sapaatiummat Skotlandimi naapeqatigiinneranni isumaqatigiissut saqqummiunneqarpoq. 

15 procentimik akitsuut Trumpip EU-mit USA-mut eqqussukkanut 30 procentimik akitsuummik atuutilersitsiniarluni sioorasaarutaanit affaannaavoq. 

- Ullumikkut eqqortumik alloriartoqarpoq, isumaqatigiissullu misissorniarlugu, nalilersorniarlugu inaarutaasumillu akuerineqarnissaa inissikkumallugu suliaq Siunnersuisoqatigiinnut (EU-mi Ministerit siunnersuisoqatigiivinut, aaqq.) ingerlateqqissavarput, kiisalu Ataatsimiititaliarsuaq peqatigalugu isumaqatigiissutip pitsaanerpaamik qanoq atuutilersinneqarnissaa piareersassavarput, Lars Løkke Rasmussen oqarpoq. 

Illuatungeriit nioqqutissaminnut akitsuusiinnginnissaannik Trumpimik isumaqatigiittoqarsinnaaneranik EU neriuuteqarsimagaluarpoq. Taamaattoqarsinnaasimanngilarli. 

Inuussutissarsiutilinnut erseqqissititsisoq 

Danmarkimi inuussutissarsiortut maannakkut erseqqissumik paasitinneqarnerat Inuussutissarsiornermut ministerip Morten Bødskovip (S) nuannaarutigaa. 

- Alloriarneq tamanna siumut oqaatigineqarsinnaasumik aalajaatsumillu atugaqalernissamut pingaaruteqarpoq, Danmarkimimmi avammut tunisat annersaat USA-mut tunineqartarput, danskillu immikkoortortaqarfii USA-miittut 90.000-init amerlanerusunik suliffissaqartitsisimapput. 

- Qallunaat inuussutissarsiortut peqatigalugit USA-mi sunniuteqarluartumik peqataanerup alliartortuarnissaa qulakkeersinnaaniassagatsigu maanna isumaqatigiissut misissoqqissaassavarput, allakkatigut oqaaseqaammini taanna allappoq.