Eqqartuussivimmi suliaq pingajussaanik kinguartinneqartoq: Pakatsinartorujussuuvoq

Eqqartuussiveqarfik Qeqqata KNI-p pisortarisimasaata Peter Grønvold Samuelsenip arnanut tallimanut KNI-mi atorfeqartunut kannguttaatsuliorsimasutut unnerluutigineqarnera pillugu sisamanngornermi aalajangiisussaagaluarpoq.

Paasissutissanilli nutaanik takkuttoqarmat suliap suliarineqarnera sivitsoqqittoq, unnerluussisoq Anne Clinton oqarpoq.

- Nutaanik paasissutissanik ullumi takkuttoqaqqippoq, taakkulu sukumiisumik suliareqqaartariaqarput. Taamaammat ilisimannittumik allamik aggersaassaagut. Paasissutissat misissorluaqqaagassaasut uppernarsaasussarlu taanna aggersarneqartariaqartoq, unnerluutigisap illersuisualu isumaqatigiippugut, unnerluussisussaatitaasoq, Anne Clinton oqarpoq.

AAMMA ATUARUK Eqqartuussut ullumikkut inerneqanngilaq: KNI-p pisortarisimasaata eqqartuussaanera kinguartinneqaqqittoq

Suliarli innarleqqunagu paasissutissat nutaat sorpiaanersut taassuma illersuisulluunniit Finn Meinelip oqaatigerusunngilaat.

- Qanoq ililluni nalunaarutiginnittoqarsimanera matumani pineqarpoq, taannaavorlu paasilluagassarput, Finn Meinel oqarpoq.

AAMMA ATUARUK KNI-mi pisortaasimasoq pillugu ilisimannittoq eqqartuussivimmi: Peter sulisitsoralugu soorlu tarnikkut qiiaammisaarnartuliamiilluni

Taamaammallu ilisimannittunik killisiueqqaartariaqarlutik, taanna nassuiaavoq.

- Imaassinnaavoq uppernarsaarsut tusarniaqqikkigut, immaqalu aamma ilisimannittut allat tusarniaqqaassavagut, Taava aamma suliap sulirianerani ingerlariaasiusimasumik politeeq tusarniaffigissajunnarsivarput.

Illuatungeriinnut tamanut uggornartoq

Eqqartuussivisimmi suliap taassuma naammassinissaa taanna marloriarlugu kinguartinneqareerpoq.

Siullermik unnerluussisusaatitaasoq illersuisorlu Sisimiunut apuussinnaanngimmata, tullianilu ilisimannittut ilaat coronalersimammat.

Illersuisup unnerluussisullu tamarmik kinguartitsineq uggoraat:

AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai

- Soorunami kinguartitsineq illuatungeriinnut tamanut uggornarpoq, suliaq naammasserusukkaluarparput Anne Clinton oqarpoq.

- Aap, pakatsinaqaaq. Piossutsilli suliamio matumani pingaaruteqartut saqqummiunneqarnissaat pingaaruteqarpoq, Finn Meinel oqarpoq.

Peter Grønvold Samuelsen pineqaatissinneqarsimasunut qaammatini pingasuni inissiisarfimmiissasoq, unnerluussisut piumasaraat, pineqartorli pisuunnginnerarpoq iperagaanissanilu piumasaralugu.

Eqqartuussinissamut nutaamik suli ulluliisoqanngilaq.