KNI-mi pisortaasimasoq pillugu ilisimannittoq eqqartuussivimmi: Peter sulisitsoralugu soorlu tarnikkut qiiaammisaarnartuliamiilluni
Sulisunut arnanut pisortaq allaffimmi ganginilluunniit saneqqutileraanni attuualaartinneq nalinginnaasuuvoq.
Ulloqeqqanut kantiinami nerinermi tulleriiaartuni saavaniinnginnissaq pingaartuuvoq. Tassami nalussanngilat assai tununni sumut tamaanga attuuailaarisut malugissallugu.
Eqqartuussisoqarfik Qeqqani ilisimannittup Peter Grønvold Samuelsen pisortaanerutillugu KNI-mi ulluinnarni pisartut pingasunngormat oqaluttuarai.
Oqaatiginiakkani ima erseqqissarpaa:
- Oqartarpugut: Peter sulisitsoralugu soorlu tarnikkut qiiaammisaarnartuliamiilluni. Tassami misigisatta nipituuliuutiginissaat qunugigatsigu.
AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Ilisimannittoq aggersarneqarpoq KNI-mi pisortaasimasoq sulisunik tallimanik kinguaassiuutitigut kannguttaatsuliorsimasutut unnerluussaammat, tamannalu 2016-ip 2021-llu akornanni pisimaneragaavoq.
KNI (Kalaallit Niuerfiat)
KNI tassaavoq aktieselskabi imminut pigisoq, nioqqutissanik ulluinnarsiutinik, atuinermut iluaqutissanik aamma ikummatissanik Kalaallit Nunaannut pilersuisoq.
Ingerlatsivik sisamanik nioqquteqarfeqarpoq tassaasunik Polaroil, Pilersuisoq, KNI Engros aamma aamma piginneqatigiit suleqataasut Neqi A/S.
KNI-p siulersorneqarfia Sisimiuniippoq. KNI (Kalaallit Niuerfiat)
Peter Grønvold Samuelsen unnerluussutini tamani pinngitsuunerarpoq.
- Sullitara oqarpoq unnerluussummi allassimasutut pisoqarsimanngitsoq. Kinguaassiuutitigut kannguttaatsuliorsimanngilaq. Taamalu suliamut pinngitsuutinneqarnissaq piumasaqaatigaarput, Peter Grønvold Samuelsenip illersuisua Finn Meinel KNR-imut oqarpoq.
Akerlianik unnerluussisussaatitaasut pinerluuteqarsimasunut inissiisarfimmiitinneqarnissaa piumasaqaatigaat.
- Unnerluussisussaatitaasut qaammatini pingasuni pinerluuteqarsimasunut inissiisarfimmiitinneqarnissaa piumasaqaatigaat, isumaqarattami suliami uani pissutsit sakkortusaasuusunik imaqartoq. Ilaatigut pisuni arlalinni unnerluussaasoq arnanut taakkununnga naleqqiulluni qaffasinnerusumi inissisimammat, unnerluussisoq Anne Kathrine Clinton oqarpoq.
Suliffik anigorniagassaavoq
Suliaq Eqqartuussisoqarfik Qeqqani Sisimiuni sapaatip akunnera manna marlunngormat pingasunngormallu suliarineqalerpoq.
Ullut taakku marluk ingerlaneranni unnerluutigineqartoq ilisimannittullu arfineq marluk nassuiaateqarput.
Pingasunngormat ilisimannittut tallimat ilisimannittut issiavianniipput.
Tamarmik massakkut siusinnerusukkulluunniit KNI-mi sulisuupput aammalu nammineq kannguttaatsuliorfigineqarsimallutik imaluunnit kannguttaatsuliornerit ilaannik, pisortarisimasanik unnerluussutaannik takusarsimallutik.
AAMMA ATUARUK KNI pillugu suliami ilisimannittoq: Allanut oqaraluaruma soraarsitaanissara annilaanngatigaara
- Suliffik anigorniagassaavoq, arnaq piffissap ilaani Peter Grønvold Samuelsenimik qanimut suleqateqartoq nassuiaavoq.
Qaammatit siulliit marlussuit ajunngitsumik suleqatigiittut, oqaluttuarpoq. Taavali suna tamarmi mumippoq:
- Peqqarniillivoq. Kanngunarsaanerit, nikanarsaanerit, suaartarnerit assortuunnerillu amerlaqaat, nassuiaavoq.
Ilismannittoq naapertorlugu pisortaq ajunngitsunik ajortunillu ulloqartarpoq. Ulluni ajortuni kammasertarpoq. Ulluni ajunngitsuni qaninniaasarpoq.
Imaassinnaavoq tassaasut pukutsukkut attuualaarineq, pakkussineq atoqatigiinnerlu pillugu aperisarneq.
Misigisimavunga pisuullunga
Ataasiarluni akulaavatigut tiguaa, oqarpoq. Taamani sulinerminnut atatillugu angalapput, suleqataasorlu alla pingajoqarlugu arpallutik.
Pisortaq kinguarpoq, quisaartumillu atoqatigiinnermut paasineqarsinnaasumik oqarluni, akivaalu.
Ilisimannittoq naapertorlugu tamatuma Peter Grønvold Samuelsen sukkatsisippaa. Anguaa aallartillunilu.
- Nikassarneqartutut aamma nammineq pisuuusutut misigivunga. Misigaara attuualaarinissaa akuerisimallugu. Kisianni nikassarneqarpunga, arnaq oqarpoq.
KNI A/S-imi kanngunartuliat
KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Kisianni iliuuserisartagaanut maalaanngisaannarpoq:
- KNI-miikkama silarsuarmi kisimiippunga. Saaffissaqanngilanga. Tatigisassaqanngilanga, oqarpoq nangillunilu kingusinnerusukkut uippakajaarneq, annilaanganeq nikallortoornerlu atulersimallugit.
Ajuutit taakku KNI-mi misigisaminit aallaaveqartut isumaqarpoq.
Ilisimannittoq alla nassuiaavoq pisortaminut qaninnermut saaffiginnissimalluni pisortaanerullu kannguttaatsuliortarnera maalarutigalugu.
Tamannali pillugu pisortaata akisimavaa: KNI-mi sulissagaanni nukittuujusariaqarpoq.
Ilisimannittoq taanna ilaatigut pisumik oqaluttuarpoq, taamanikkut pisortaasup allaffimmi ullaannguakkut tunuminiit nipaarsaarluni tikissimagaani ivianginilu saneraanniit tigusimallugit.
- Kamaammerpunga tupallungalu, taavalu oqarpoq: Allaasoralutit-una, oqaluttuarpoq.
Ukiut arlallit ingerlapput, Peter Grønvold Samuelsenip politiinut nalunaarutiginissaata tungaanut.
Nangilluni suliffeqarnerminut kinguneqarsinnaanera annilaanngatigigamiuk qunugisimallugu nassuiaavoq.
Nassuiaatit nalorninartoqartippai
Taassuma ilisimannittullu allat nassuiaaneranni Peter Grønvold Samuelsen unnerluussaasup inaani eqqissisimavoq.
Allallattaarpoq, taamaanngikkaangalli eqqissimasarpoq tusarnaarlunilu.
Illersuisua oqaaseqaleraangami pingaartumik arnat nassuiaataasa ilaat nalunaarutiginninnermut atatillugu politiit suliarisimasaanniittunut naapertuutinngitsut apeqqutigisarpai.
Assersuutigalugu ilisimannittup eqqartuussivimmi pisoq sulisut kaagisuullutik isersimasarfianni pisimasoq oqaluttuaraa, tassanilu Peter Grønvold Samuelsenip aperisimaqaani atoqatigiinnermi periaaseq ”trillebør” nalunnginneraa.
Taama pisoqarneranik apersuinermik nalunaarusiami allaaserineqarpoq, pisimasoq taanna gangimi allanik inoqanngitsumi pisimasoq.
Tassunga ilisimannittoq oqarpoq:
- Politiit kukkullutik allassimanerat akisussaaffiginngilara.
Unnerluussisussaatitaasoq aperimmat ilisimannittoq Peter Grønvold Samuelsenip soraarsitaanissaata pilersaarusiorneranut ilaanersoq, akivoq naamik:
- Allat uattut misigisaqarnissaat kissaatiginngilara. Peqqinnangilaq, oqarpoq.
Aalajangiinissaq coronamit kinguartinneqarpoq
Pilersaarutaagaluarpoq suliaq pingasunngornermat aalajangiiffigineqassasoq.
Tamannali pinngilaq ilisimannittoq suliamut pingaaruteqartoq coronavirusimik napparsimalersimammat taamalu eqqartuussivimmut aggersinnaanani.
Kingunerisaanik ilisimannittumik apersuineq suliallu aalajangiiffigineqarnissaa kinguartinneqartoq.
- Tamaanga killissimagatta uggornaqaaq suliarlu naammassisinnaanagu. Suliaq massakkut naammasserusukkaluarparput, illersuisoq Finn Meinel oqarpoq.
Unnerluussisussaatitaasorlu Anne Kathrine Clinton isumaqagtaavoq.
- Neriuppunga suliaq qanittukkut piffissalerneqassasoq naammassineqarniassammat, kisianni naammagisimaaarpara uppernarsaatit tamangajammik ingerlanneqareermata, taavalu ilisimannittoq ataasiinnaq amigaataalerluni, oqarpoq.
Marsimi 2021-mi saqquummerpoq KNI-mi pisortaasimasoq politiinut kannguttaatsuliornerit pillugit nalunaarutigineqarsimasoq.
Sioqqutilaarlugu Peter Grønvold Samuelsen suliffimminit tunuarpoq.
Peter Grønvold Samuelsen KNI-mi ukiuni arfineq marlunni pisortaaneruvoq.
Eqqartuussisoqarfik Qeqqa suliap qaqugu nanginneqarnissaa pillugu suli nalunaanngilaq.
