KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Marlunngormat ullaakkut Peter Grønvold Samuelsen eqqissisimalluni tatitullunilu Eqqartuussisoqarfik Qeqqani nassuiaavoq.
Arnanut tallimanut KNI-mi sulineranni kannguttaatsuliorsimasutut unnerluussaavoq, taamani pisortaaneruvoq.
Peter Grønvold Samuelsen nalunaaqutaq 9.35 unnerluussaasut issivianut ingippoq apeqqutillu akisarlugit nalunaaqutaq 12-ip tungaanut.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Unnerluussutit tamaasa ilumuunnginnerarpai, arnallu allaaserisimasaat pillugit aperineqaraangami ilaatigut oqartarpoq eqqaamanagu.
- Eqqaamanngilara.
Arnat assuarnartumik attorsimanerlugit aperineqarami taama akivoq.
AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga
Aperineqarami arnat ersaatigut kunissimanerlugit pakkussimanerlugillu nassuiaavoq taamaattarsimalluni, kisianni suleqatigiit pisarnerattut.
Aamma nassuiaavoq suliffimmi pingaartorsiortuunngitsumik pissuseqarlutik, aamma sivikitsumik oqaloqatigiinnerni illarnartuni atoqatigiinnernut tunngasuni peqataasarsimalluni.
Eqqartuussineq kinguartoortoq
Marlunngorpat ualikkut eqqartuussineq ilisimannittunik killisiuinertalimmik nangissaaq.
Aallaqqaataaniit eqqartuussineq pilersaarutigineqarpoq ulluni marlunni ingerlassasoq pingasunngornikkulllu nammassineqarluni. Kisianni ilisimannittunit tallimaasunit ilaat ataseq coronalersimammat aalajangiineq kinguartinneqarpoq.
Unnerluussisoqarfiup KNR-imut tamanna ilumoornerarpaa. Qaqugu pissanersoq suli ilisimaneqanngilaq.
Unnerluussisoqarfiup qaammatini pingasuni pineqaatissinneqartunut inissiisarfimmiitinneqarnissaa piumasaraa, Peter Grønvold Samuelsen-ilu pinngitsuunerarpoq pinngitsuutinneqarnissaniliu piumasaralugu.
