Eqqartuussut ullumikkut inerneqanngilaq: KNI-p pisortarisimasaata eqqartuussaanera kinguartinneqaqqittoq
Eqqartuussisoqarfik Qeqqata KNI-p pisortarisimasaanik, Peter Grønvold Samuelsenimik eqqartuussinermi nutaamik pingajussaanik ulluleeqqittussanngorpoq.
Samuelsenip arnanut tallimanut kannguttaatsuliorsimasutut unnerluutigineqarnerani eqqartuussivimmi suliami eqqartuussut sisamanngornermi aalajangerneqartussaagaluarpoq.
Paasissutissanilli nutaanik ullumikkut takkuttoqarnera pissutigalugu ilisimannittunik arlalinnik nassuaateqartoqarnissaa pisariaqalermat eqqartuussineq kinguartinneqaqqippoq.
Eqqartuussivimmi suliaq nalunaaqutaq qulingiluanut aallartinneqarpoq, pilersaarullu malillugu ilisimannittut pingasut killisorneqareerpata eqqartuussut inerniliiffigineqartussaagaluarpoq.
61-inik ukiulik, Peter Grønvold Samuelsen arnanut tallimanut Namminersorlutik Oqartussat suliffeqarfiutaanni sulisunut kannguttaatsuliorsimasutut unnerluutigineqarpoq.
Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
Arnat tallimat pisortarisimasaminnit atorfeqarnermi nalaanni kissaatiginngisaminnik attorneqartarsimanerarput.
Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Peter Grønvold Samuelsenip eqqartuussisoqannginnerani eqqartuussinerullu nalaani unnerluutigineqartut tamaasa eqqunnginnerarpai pinngitsuutinneqarnissanilu piumasaralugu.
Eqqartuussivimmi suliaq marloriarlugu kinguartinneqartoq
Eqqartuussivimmi suliap februaarip ulluisa aallqqaataanni aallartinneqartoq aappaanni aalajangiiffigineqarnissaa pilersaarutaasimagaluarpoq.
Taamaattoqanngilarli, ilisimannittutummi nassuiaateqartussaq ataaseq coronavirusimik tunillatsissimavoq, taamaammallu eqqartuussivimmut takkussinnaasimanani.
Eqqartuussineq taamaalilluni aappassaanik kinguartinneqarpoq.
Eqqartuussineq siorna decembarimi ingerlanneqartussat aallaqqaammut pilersaarutigineqaqqaaraluarpoq.
Nuummili mittarfiup quasarnera pissutigalugu illersuisut unnerluussisussaatitaasullu aallarsinnaanngimmata kingunartinneqarpoq.
KNI-p pisortarisimasaata politiinut unnerluutigineqarsimanera 2021-mi marsimi saqqummiunneqarpoq.
Tamatuma pinngitsiarnerani Peter Grønvold Samuelsen atorfimminit tunuarsimavoq.
Taanna KNI-mi ukiuni arfineq-marlunni pisortaanerusimavoq.