Siulittaasussaq isumaqatigiinngissutigaat
Inatsisartut siulittaasuat Lars-Emil Johansenip inatsit tunngaviusoq pillugu isumalioqatigiissitami siulittaasunngorsinnaanera partiimit illuatungiliuttumit Demokraatinut ilaasortamit isorineqaqaaq. Partiilli naalakkersuisoqataasut ajornartorsiutissaqartitsinngillat.
AAMMA ATUARUK Ingen ekstra post til Inatsisartut-formand
Lars-Emil Johansen inatsisartunut siulittaasuunermi saniatigut isumalioqatigiissitami siulittaasunngussaguni politikkikkut pingaaruteqaqisumi aalajangeeqataasinnaalissaaq. Tamannalu Demokraatineersup isornartoqarteqaa, isumaqaramimi Inatsisartut siulittaasuat politikkikkut oqimaaqatigiittumik sulisussaasoq.
- Isumaqarpungalu Inatsisartunut siulittaasuuneranut tamanna tulluanngilluinnartoq, Michael Rosing oqarpoq.
Kisianni Inatsisartut siulittaasuat siammasissumik sulinissaa, aalisarnermut naalakkersuisup, Partii Naleqqap siulittaasuata Hans Enoksenip tatigaa.
AAMMA ATUARUK Lars-Emil marlunnik angisuunik suliaqarusuppoq
- Kingumut qiviaraanni, namminersorneruneq eqqunniarnerani sulisitagut, tassalu Jonathan Motzfeldt Inatsisartunut siulittaasuuvoq aammalu Christian Mejdahl Folketingimut siulittaasuulluni. Taava taanna massakkut ajornartorsiummik takusaqarfiginngilarput, suliat sukkasuumik pitsaasumillu naammassineqarnikuupput.
Inuit Ataqatigiit partiit allat kimik kikkunnilluunnit toqqaassanersut akuliuffigiumanngilaat:
- Soorunami partiit taakku aallartitaat namminneq akisussaaffigivaat akunnerminni kikkut toqqassanerlugit, Inuit Ataqatigiit sinnerlugit isumalioqatigiissitami ilaasortassatut inassutigineqartoq, Mimi Karlsen, oqarpoq, nangillunilu:
- Isumaqarpungalu aamma taanna Siumukkunninngaanniit toqqagaasimappat taanna ataqqisariaqaripput. Tassanngaanniillu isummersuutit aamma tusarumaarpagut qanoq issanersut.