KAK: Concacafimut matu matoqqappat matut allat ammassapput

Nunat tamalaat arsaannermi kattuffissuanni maanna ilaasortanngunnginneq kalaallit arsaattartut kattuffianni KAKmi akueriuminaatsinneqaqaaq.

Amerikap avannaamiut Caribiamiullu kattuffissuata Concacafip kalaallit ilaasortanngorniarnerat itigartippaa. Tamanna sioqqullugu Europamiut kattuffissuat UEFA aamma itigartitsinikuuvoq. Kalaallit pakatseqaat maanna ilaasortanngorniarnermi ataatsimiigiaqquneqaratilluunniit itigartiinnarneqaramik.

- Ataatsimeeqatigiinnissamut utaqqigaluarpugut taamaattumik assut pakatsinarpoq ataatsimeeqatigiinnertaqanngitsumik itigartitsisoqarmat, KAK-mi siulittaasoq Kenneth Kleist KNR-mut oqarpoq.

Taamaattumik KAK Concacafimut toqqaannaq oqaaseqarumarpoq minnerunngitsumillu itigartitsinerannut tunngavilersuummik tusarusukkamik.

- Maannakkorpiaq misissorparput itigartitsinermut sunarpiaq pissutaanersoq allagarsiinnarnikuugatta qinnuteqaapput itigartinneqartoq, Kenneth Kleist oqarpoq.

Europa sammilerpaat

Kalaallit arsaattartut kattuffianni siulersuisuusartut nunat tamalaat kattuffissuanni ilaasortanngorniarneq sulissutigaat. Taamaattumik tunngavilersugaanngitsumik itigartitaaneq pikkunaartoorfioqaaq.

- Taamaattumikn Concacafik præsidenti ataatsimeeqatiserivara itigartitsinermut tunngavilersuutaat apersuutiginiarlugit aammalu siunissami iluaqutigisinnaasatsinnik arlaannik allanngugassaqarnersugut tusarniarlugu, Kenneth Kleist oqarpoq.

KAKlli aarleqqutigaa Concacafimut matu Nunatsinnut matoqqavissimassasoq taamaattumillu nunanik allanik suleqatissarsiortoqassalluni.

- Taakunga matut matoreerput. Aamma ilimatsaannikuuarput itigartitsisoqalerosq ataatsimiigiaqqusisoqanngimmat, Kenneth Kleist oqarpoq.

- Siunissamulli isigissagutta pissusissamisuuginnarpoq Islandimut, Savalimmiunut, Danmarkimut immaqalu Norgemut Sverigemullu samminissarput. Ingerlariaqqissagutta Europa sammisariaqarparput.

- Concacaf matuvoq, matulli allat taava ammassapput, Kenneth Kleist naggasiivoq.