Nomami pisortaasoq sulisorisimasaminit isornartorsiorneqareerluni tunuartoq

René Redzepi, Københavnimi neriniartarfimmik Michelinimik ullorialinnik pilersitseqataasoq piginneqataasorlu, Nomami igaffimmi pisortatut tunuarpoq.

Tamanna Redzepip inoqatinut attaveqaammi Instagramimi pingasunngornerup unnuaani oqaluttuaraa.

-  Neriniartarfimmik ukiut 20-t sinnerlugit ineriartortitsereerlungalu ingerlatsereerlunga tunuarniarlunga aalajangerpunga, pisortavullu pikkorissut neriniartarfimmik ingerlatsinerup ingerlariaqqinnissaanut akisussaaffilerpakka, René Redzepi allappoq.

Nomami sulisuusimasut Redzepimit igaffimmut atortut atorlugit kiinnamikkut anaatittarsimanerminnik oqaluttuarnerat aviisimi The New York Timesimi qanittukkut allaaserineqareersorlu taama nalunaaruteqarpoq.

Sulisuusimasut 35-t 2009-miit 2017-imut misigisimasatik allaaserisami oqaluttuaraat.

Taakkua 30-t missaat René Redzepimit pisortanillu allanit annersinneqartarsimaneq "ulluinnarsiutaasoq" oqaluttuarput.

René Redzepip kingullertigut eqqartuineq oqaaseqarfigaa. Tamanna neriniartarfik siusinnerusukkullu aqutsisut pillugit oqallinnermik pingaaruteqartumik pilersitsisoq allappoq.

- Aqutsisuulluarnerunissara sulissutigisimavara, Nomamilu kulturi ukiorpassuarni allanngortinniarlugu iliuuseqangaarnikuuvugut.

- Allannguinerit tamakku pereersunik allannguisinnaanngitsut ilisimaaraara. Utoqqatsissut naammanngilaq. Iliuuserisimasakka pillugit akisussaaffimmik tigusivunga, Nomami pisortaasimasunngortoq allappoq.

Los Angelesimi ammaanissaq suli pilersaarutaasoq

Kinguninngua Redzepi neriniartarfimmi sulisuusimasunut sammivilimmik videoliamik Instagramimut ikkussivoq.

Maannakkut nammineq pilluni ukkassineq Nomamut, neriniartarfittut ukiuni qulikkaani makkunani pitsaanerpaatut oqaatigisaminut, akornutaasoq, taanna oqarpoq.

Redzepip oqarnera naapertorlugu Nomap neriartortut ataasiakkaarlugit qularunnaarsinnerisigut pissutsit maanna atuuttut anigorniarpai.

Noma Los Angelesimi neriniartarfimmik ammaaniarpoq, pilersaarutillu naapertorlugit illoqarfissuarmi nerisassanik juunip naanissaata tungaanut sassaalliissaaq.

The New York Times naapertorlugu allaaserisaq pissutigalugu neriniartarfik taanna aningaasaleeqataasunit arlalinnit tapersersorneqarunnaarsimavoq.

René Redzepi suleqatini Los Angelesimi neriniartarfimmik ingerlatsissasut Instagramimi allappoq.

- Suleqatitta Los Angelesimi neriniartarfimmi suliinnarnissaat pilersaarutaavoq, tamannalu immikkut ittuussaaq, tassanimi suliaminnik takutitsisinnaassagamik neriartortunullu immikkut ittunik sassaalliisinnaassallutik, Redzepi allappoq.

Aviisi Los Angeles Timesip allaaserisaa naapertorlugu inuit aqqaneq-marluk missaanniittut neriniartarfiup silataani akerliussutsimik pingasunngornermi ullaakkut takutitsipput.

Ilaatigut ima oqariartuutilinnik allagartarsuarnik tigummiarput: "Nomap aserorterpaanga" aamma "naalagaaffiit akissarsiaqarnani sulinermik tunngaveqarpoq".

Noma Australiami, Mexicomi Japanimilu neriniartarfinnik  siornatigut ammaasarpoq.

Noma Københavnimi 2003-mi ammaqqaarpoq, kingornalu Michelin-imi pingasunik ulloriaqalersimavoq tallimariarlunilu nunarsuarmi neriniartarfiit pitsaanersaattut toqqarneqarluni.

/ritzau/