Trump: Iran isumaqatigiinniarnerni peqataappat peqataanngippalluunniit assigiitsippara

Iran isumaqatigiinniarnernut peqataappat peqataanngippalluunniit USA-p præsidentiata Donald Trumpip assigiitsippaa.

Tusagassiortunik Washington D.C.-p ungasinngisaani sakkutooqarfimmi Joint Base Andrews apersorneqarnermini taama oqarpoq.

- Iran peqataappat peqataanngippalluunniit assigiitsippara, Trump oqarpoq.

USA Iranilu Pakistan isumaqatigiissitsiniartoralugu Pakistanip illoqarfiisa pingaarnersaanni Islamabadimi arfininngormat isumaqatigiinnialerput.

Illuatungeriilli suli isumaqatigiissusiornatik isumaqatigiinniarnernit sapaammi qimagupput. Isumaqatigiinniarnerillu angusaqarfiunnginnerat pillugu Iran USA-lu kingorna pisuutitsipput.

Sakkuaakkunnaarallarnissamik isumaqatigiissut qajannartoq

Sapaatit akunnerini marlunni sakkuaakkunnaarallartoqarnissaa illuatungeriit sapaatit akunnerata siuliani marlunngormat isumaqatigiissutigaat.

Isumaqatigiissutilli qajannartuunera paasinarsipallappoq, Israelimmi Libanonimik saassussinini kingorna nangeqqippai, soorlu aamma Hormuzip ikerasaa matoqqajuaruarsinnartoq.

USA Iranimik saassusseqqinnissamik eqqarsaatersuuteqartoq, tusarfiit suliamut atatillugu ilisimasallit aviisimut The Wall Street Journalimut oqaatigaat.

Isumaqatigiinniarnerit unittooqqanerat pissutigalugu Iranimik killilimmik saassussisoqarsinnaanera Trumpip siunnersuisuisalu eqqarsaatersuutigigaat tusarfiit oqaatigaat.

Tusarfiilli nalunaarutaat pisortatigoortumik uppernarsarneqarsinnaasimanngitsut, nutaarsiassaqartitsiviup Reutersip allaaseraa.

Umiarsuit Iranimi umiarsualivinnit tamanit tamanullu ingerlaartut USA-p illersornissaqarfianit nunatta nalunaaqutaa naapertorlugu ataasinngornermi ualikkut nalunaaqutaq sisamaniit assersorneqalerumaartut, USA-p sakkutuuisa aqutsisoqarfiata Centcomip sapaammi unnukkut nalunaarutigaa.

Hormuzip ikerasaa USA-mit assersorniarneqartoq Trumpip sapaammi siusinnerusukkut oqaatigaa, Iranimili sakkutuut sapaammi kingusinnerusukkut aamma oqaatigaat Iranimiut Hormuzip ikerasaa aqukkaat.

Hormuzip ikerasaa uuliamik gassimillu nunarsuup sinneranut pilersuinermut pingaaruteqarluinnarpoq. Uuliammi nunarsuarmi nioqqutigineqartartup 20 procentiata missaa Hormuzip ikerasaatigut assartorneqartarpoq.

/Ritzau/