Danskit ikiuiniartarfiata pisariaqartitsilluinnartoqartoq malugigaat
Danskit ikiuniaqatigiiffiat, Hjælp Din Næste angerlarsimaffeqanngitsunut inuuniarnermikkullu ajornartorsiuteqartunut ikiuiartorluni sapaatip akunnerani matumani Nuummiippoq.
Ikiuisoqarnissaanut pisariaqartitsilluinnartoqartoq, nammineq kajumissutsiminik suliaqartup, Julius Asgerip oqaatigaa – taamaammallu nunatsinnut ataasinngormat siullermeertumik tikipput.
Taakku atisat oqortut, kamiit, siniffissat, sinngup puui immikkut ittut 23-nik issittumi atorneqarsinnaasut nassataraat.
Ikiuiniartartut angalanissaminnut 150.000 koruuninik katersisimapput.
Taakku tikeraarnerminni angerlarsimaffeqanngitsunut atortussanik agguaassillutillu pizzamik, tiimik kaffimillu sassaalliuteqarput.
- Atortut angerlarsimaffeqanngikkaanni pisariaqarluinnartut, Julius Asger oqarpoq.
- Inunnut sapinngisamik amerlanerpaanik ikiuiniassamut tunngassuteqarpoq.
Tamanna inuuvugut
Suliniaqatigiiffiup kikkulluunniit angerlarsiffeqanngitsunngorsinnaasut tunngavigaa.
Inuunermi pisoqariataarneratigut anigoruminaatsumik nakkariartuinnartoqaratarsinnaasarpoq.
Danmarkimi Kalaallit Nunaanniluunniit najugaqaraluaraanni ikiorneqarnissaq pisariaqartoq, Julius Asger oqarpoq.
Suliniaqatigiiffiup naalagaaffimmut attuumassuteqanngitsup inuiaqatigiittut ’inuk angerlarsimaffeqanngitsuunermit isigineqaqqaassasoq’ inuillu sapinngisamik ikiorneqartariaqassasut isumaqarpoq.
- Isumassorneqartariaqarputit, atisanik oqortunik, kaffimik – aamma oqaloqatigineqarluarnissamik pisariaqartitsivutit.
Suliniaqatigiiffiup taamaammat inunnik aqqusinermi oqaloqatiginninnissaq, taakku oqaluttuassartaannik tusarnaarnissaq najornissaallu pingaaruteqarluinnarsorai, Julius Asger oqarpoq.
Taakku taamaalillutik Kalaallit Nunaanni pisariaqartitsisoqartoq paasivaat.
Taakku Christianshavns Torvimi kavaajanik oqortunik pizzanillu sapaatit tamaasa agguaassiffigisartakkaminni 'ikinnguterpassuami' oqaloqatigisarnerat aqqutigalugu – kiisalu ornittakkamit Uummateqarfimmeersunit Nuummilu angerlarsimaffeqanngitsut unnuisarfiannit pisariaqartitsisoqarnera paasigitsik, Julius Asgerip oqaatigaa.
Taakkulu Danmarkimi sikkilinik usilinnik angalaarlutik nerisassanik sinngup puuinillu angerlarsimaffeqanngitsunut agguaassisarnermisulli atortussanik, nerisassanillu agguaassiartorlutik maanna Nuummiipput.
Aamma angerlarsimaffeqanngitsunut initaarsimasunut najugaqarfissaasa nuannersuunissaannut aaqqissuussinermut aamma ikiuuttarput.
Pisariaqartitsineq tupaallaatigigaat
Taakku nunatsinni pisariaqartitsisoqangaatsiarnera tupaallaatigisimavaat.
Taakku pissutsit ilungersunartut nalunngereeraluarlugit inuit qanoq amerlatigisut ilungersunartumiinnerat ikiorneqarnissaminnillu pisariaqartitsilluinnarnerat tupaallaatigigitsik, Julius Asgerip oqaatigaa.
Nuummi aqqusinermi atortussanik nerisassanillu agguaassiartoraangamik takkuttorpassuusartut taassuma oqaatigaa.
Taakkulu Nuummi angerlarsimaffeqanngitsunut suliniutit qanoq ikitsiginerat tamatumalu saniatigut inissiat akitsoriartornerat kingunerisaanillu inuuniarnermi aningaasartuutit amerlalluinnarnerat paasigitsik, Julius Asgerip oqaatigaa.
- Tamanna pissutigalugu amerlanerusut angerlarsimaffeqarunnaartarput, nerisassallu aamma akisoorujussuullutik, taanna oqarpoq.
- Pissutsit ilungersunartorujussuupput, suliniaqatigiiffinnik amerlanerusunik pisariaqartitsinerpaanut ikiuiartorluni Nuummukartoqarnissaa pisariaqartinneqarpoq.
Ukiuunerani pisariaqartitsisoqarnerpaavoq, angerlarsimaffeqaranimi unnuami aqqusinermiiginnarnissaq ulorianarluinnarsinnaavoq.
Suliniaqatigiiffiup nunatsinni Uummateqarfik aaqqissuussaanermi ajornartorsiuteqartoqarnera pillugu oqaloqatigigaa, Julius Asgerip oqaatigaa.
Assersuutigalugu Kommuneqarfik Sermersuumeernani kommunimit allameersuugaanni angerlarsimaffeqanngitsunut unnuisarfinnut assigiinngitsunukartoqarsinnaanngilaq.
Aaqqissuussaanermi ajornartorsiutit taakku illoqarfiit pingaarnersaanni aaqqiivigineqassasut, suliniaqatigiiffik isumaqarpoq, illoqarfimmimi tassani angerlarsimaffeqanngitsuuneq ajornakusoornerussammat.
Nunatsinni allaffimmik ammaasinnaasoq
Juliusip namminerlu kajumissutsiminik suliaqaqataata nunatsinniinnerminni Nuummi tikilluaqqulluarneqarnertik puigukkiutissavaat.
Inuit aqqusinermi ilassinnilluarlutillu suliniaqatigiiffiup suliaqarluarneranik oqaaseqarput.
Tamanna tulluusimaarutigaat, maanilu najuunnerulernissartik isumaliutigilerpaat, pingaartumik taama pisariaqartitsisoqarnera takoreeramikku.
- Kalaallit Nunaanni Nuummi allaffeqarneq pitsaassagaluarpoq. Kisianni Nuuk kisimi pineqarani Kalaallit Nunaalli tamarmi ikiorluarneqarsinnaanissaa soorunami anguniagaavoq. Piffissalli tamanna takutikkumaarpaa, Julius Asger oqarpoq.
