Piniarnermut allagartap akilernissaanut killigititaq qallivoq

Ukioq manna tuttunniarniaraanni umimmanniarniaraanniluunniit, piniarnermut allagartaq akilerneqartariaqarpoq.

Taama Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiuutinut nalunaaruteqarpoq.

Piniarnermut allagartamik ukioq manna pissarsiniaraanni akiliut 250 koruuni kingusinnerpaamik apriilip ulluisa 30-anni akilerneqareersimasariaqarpoq.

Siorna inatsisip nutaap atuutilernerata kingunerisaanik inuussutissarsiutigalugu sunngiffimmiluunniit piniartut allagartamik nutaamik pissarsisinnaajumallutik ukiup siuliani pisatik nalunaarutigisariaqarpaat.

Tuttut umimmaallu piniagaanerat illersugaanerallu pillugit Namminersorlutik Oqartussat nalunaarutaat nutaat 2025-mi atuutilersut naapertorlugit akuersissutinik qinnuteqarsinnaassagaanni ukiup siuliani pisanik nalunaaruteqareersimanissaq piumasaqaataasoq, naalakkersuisoqarfik tusagassiuutinut nalunaarummi allappoq.

Siorna pisat nalunaarutiginissaannut aamma apriilip ulluisa 30-at killissarititaavoq.

Piniarnermut allagartamik qinnuteqarniaraanni tamanna kommunit kiffartuussiviini imaluunniit imminut sullinnikkut www.sullissivik.gl aqqutigalugu pisinnaavoq. 

Kalaallit Nunaanni tuttoqatigiit amerlassusaat pitsaasut

Silap pissusiata allanngoriartornerata kingunerisaanik Issittumi tuttut ikiliartorumaartut, Københavnip Universitetiani siorna aasakkut misissuinerup ilaatigut takutippaa.

Pinngortitaleriffilli misissuineq tamanna Kalaallit Nunaannut tunngassuteqanngitsoq naliliivoq.

- Misissuineq pingaarnertut Amerikap avannaanut tunngassuteqartoq pillugu Pinngortitaleriffik issittumi tuttut qanoq innerinik nutaarsiassaqanngitsoq naliliivoq, aalisarnermut piniarnermullu naalakkersuisoqarfik allappoq.

Pinngortitaleriffiup paasissutissiinera naapertorlugu Kalaallit Nunaanni uumasut amerlassusaat allanngorsimanngillat amerliartorlutilluunniit.