Siumup 'Kalaallit Rangersinik' ineriartortitsineq aallartilluarusukkaa
Siumut aalajangiisinnaagaluaruni sineriatsinni aalisartut piniartullu nunatta illersorneqarneranik pingaarutilimmik qanittumi atuuffeqalersinnaapput.
Partiimmi folketingimut qinersinissamut qineqqusaarutaani najukkami upalungaarsimasut 'Kalaallit Rangers'-it aalisartunik piniartunillu ilaaffigineqartoq sineriammi nakkutilliinermut ikiuutissasut allassimavoq.
Kalaallit Nunaanni nammineq kajumissutsimik tunngaveqartumik alapernaarsuisut pillugit siusinnerusukkut aaqqissuussineqarpoq. Illuatungeriit isumaqatigiissuteqartut taamani ‘aaqqissuussinerup ineriartornissaanut ilippanaatinik misissuinissamut piareersimapput’.
Naalakkersuisut danskillu naalakkersuisuisa 2025-mi januaarimi isumaqatigiissutaata ilaani tamanna innersuussutigineqarpoq. Tassanilu 'Greenland Rangers'-itut allassimalluni.
Siumup folketingimut qineqqusaarnermi tamanna oqaluuserisassanngortippaa.
Siunnersuut tamanna KNAPK-p tassa aalisartut piniartullu kattuffiata isumalluarfigaa. Kattuffiup siunnersuut anguneqassagaluarpat taperserniarpaa.
- Taamatut eqqarsartoqassappat, KNAPK-miit ajoriffissaqartinngilarput, pissutigalugu ukiuni kingullerni nakkutilliisoqarnikkut kipiluttunartorujummik sineriak tamaat misigisaqarfiginikuugatsigu. Neriuppunga taamatut alloriartoqarumaartoq, KNAPK-p siulittaasua, Pele Blytmann oqarpoq.
Canadamiut Rangersii isumassarsiorfiusut
Sermersuaq ukiuni arlalinni aakkiartupiloorpoq. Tamanna Issittumi Kalaallit Nunaannilu niuernermi umiarsuarnut sakkutooqarnikkullu imaatigut aqqutinik nutaanik pilersitsissaaq.
Taamaammat sineriammi nakkutilliisoqarnerulernissaa pisariaqartoq, Siumut isumaqarpoq.
'Kalaallit Rangers'-illi qanorpiaq suliaqarnissaa suli ersarinngitsoq, siunnersuuteqartup folketingimullu qinigassanngortittup, Ane Lone Baggerip oqaatigaa.
- Sinaakkutit, qanorlu ittuussanersut qinersereernerup aamma sulissutigissuagut, taanna oqarpoq.
Canadami aaqqissuussineq taanna atugaalluareerpoq. KNAPK-p Canadian Rangersini ilaasortat Canadamut siorna angalanermini naapippai.
- Tasamani sinerissami atorluarneqarput. Soorlu arlaannut annaassiniarnernulluunniit imaluunniit ajutoortoqartillugu taakkuusarput tiguseqqaartut, ikiuisussat annertunerit takkunnissannut taakku paarsisarput, Pele Blytmann oqarpoq.
Aaqqissuussineq taanna danskit naalakkersuisuisa kalaallillu naalakkersuisuisa illersornissamut atatillugu Canadamut qaammatip siuliani illersornissamut isumaqatigiissutaannut aamma ilaavoq. Nunanut allanut naalakkersuisup, Vivian Motzfeldtip (S) aaqqissuussineq tamanna pillugu Canadamit ilisimasanik avitseqatigiinnerunissaq qilanaaraa.
Aningaasartuutit Danmarkip akilissagai
Siumup oqarnera naapertorlugu 'Kalaallit Rangers'-inut aningaasartuutit nunatta illersorneqarneranik ullumikkut akisussaaffeqartumit, tassa Danmarkimit akilerneqartariaqarput.
- Malaatiinnarlugu oqarsinnaanngilanga imannak akissarsiaqassapput, imannak atuuffeqassapput. Kisianni isumaqatiginninniutigineqassaaq. Akilerneqartassapput pinngitsoornatik suliamut pingaaruteqartorujussuarmut nunatsinnut tunngassutilimmik suliaqassammata, Ane Lone Bagger oqarpoq.
KNAPK-lli kattuffiup akissarsiaqartitsinissamut apeqqut aalajangiiffigisinnaanngikkaa oqaatigaa.
- Massakkorpiaq taakku tungaatigut oqaaseqarsinnaanngilanga. Aamma siumungaaq suli eqqartoreerneqarsinnaanngilaq suli pilersinneqanngitsoq, Pele Blytmann oqarpoq.
Naleqqap siunnersuut assingusoq siunnersuutiginikuugaa, Naleqqap siulittaasuata, Pele Brobergip aperineqarami oqaatigaa. KNR-ip suliaq Pele Brobergimik apersuinermik malitseqartissavaa.
