Kunngeqarfik Canadalu illersornissamut nutaamik isumaqatigiissuteqarput
Kunngeqarfik Canadalu illersornissaq pillugu isumaqatigiissummik nutaamik atsioqatigiipput.
Tyskit illoqarfianni Münchenimi, NATO-mut ilaasortat isumannaallisaaneq pillugu ataatsimeersuarnermi naapipput.
Nunanut allanut naalakkersuisoq Vivian Motzfeldt (S), illersornissamut ministeri Troels Lund Poulsen aamma Savalimmiuni suleqatigisa Sirið Stenberg peqatigalugit, Canadami illersornissamut ministerimik David J. McGuinty-mik suleqatigiinnissamik isumaqatigiissummik atsioqateqarput.
Illersornissamut Ministeriaqarfiup tusagassiuutinut nalunaarummi tamanna ilisimatitsissutigaa.
Alaatsinaattuunermut aamma ilinniartitaanermut, sungiusarnermik sungiusaqatigiinnernillu nukittorsaanermut isumaqatigiissut tunngasuusoq, Illersornissamut Ministeriaqarfiup ilisimatitsissutigaa.
Canadalu suleqatigiinnissamik isumaqatigiissuteqarneq, NATO-p iluani suleqatigiinnermut tulluutiinnarani, sanilitut aamma pissusissamisoortuusoq, Vivian Motzfeldt oqarpoq.
- Canada tassaavoq Kalaallit Nunaata sanilerisaani qaninnerpaaq, NATO-milu qanittumik suleqatigisaq. Taamaammat illersornissaq pillugu qaninnerpaasatsinnik suleqateqarnissarput pissusissamisoorluinnarpoq, naalakkersuisoq tusagassiuutinut nalunaarummi oqarpoq.
Kalaallit Nunaata alapernaarsuisui
Kalaallit Nunaata alapernaarsuisui pillugit suleqatigiinnerup nukittorsarnissaanut isumaqatigiissut iluaqutaassaaq.
Tamanna Naalakkersuisut Danmarkillu akornanni immikkut isumaqatigiissummi siullermi, januaarimi 2025-imi siullermik taaneqarpoq. Kisianni alapernaarsuisussat nammineq piumassutsiminnik ingerlatsisuullutik, Issittumi Sakkutooqarfimmit suliniut 2021-mi aallartinneqarpoq. Illersornissaq pillugu isumaqatigiissut iluaqutigalugu, suliniut inuussutissarsiutitut inissinneqarpoq.
Nuna tamakkerlugu sumiiffinni upalungaarsimanermut tapertaasussanik nammineq piumassutsimik nalunaaruteqartarfeqalernissaanut, misissueqqissaaneq aallartinneqassaaq.
Canadami 'Canadian Rangers'-it isorliunerusuni sissamilu suliassanik Canadamiut illersornissaqarfiat sinnerlugu isumaginnittarput. Kalaallit Nunaanni taamaaqataanik najoqqutassiamik ineriartortitsisinnaanermut periarfissat misissoqqissaarneqassasut, immikkut isumaqatigiissummi taama allassimavoq.
Canadamiut misilittagaat maanna Kalaallit Nunaannut iluaqutaalernissaat, Vivian Motzfeldtip qilanaaraa.
- Canadamiut 'Greenland Ranger'-imik suliniut pillugu suleqatiginissaat qilanaaraara, nunanut allanut naalakkersuisoq oqarpoq.
- Canadamiut illersornissamut suliassanik isumaginninnerminni nunaqavissunik peqataatitsinermik pitsaasunik misilittagaqarput, misilittagaallu taakku ilaatigut atorumaarpagut.
Ikinngutinik pisariaqartitsineq
Kunngeqarfik Danmark piffissami matumani ikinngutinik pisariaqartitsisoq, Illersornissamut ministerip aamma erseqqissaatigaa.
Isuqatigiissut nutaaq tamatumunnga ersiutaasoq taanna isumaqarpoq.
- Kunngeqarfik - Danmark, Savalimmiut Kalaallit Nunaallu - Canadamiullu illersornissakkut suleqatigiinnissamik isumaqatigiissuteqarluta ataatsimoorluta maani sassaqatigiissinnaagatta nuannaarutigaara, tamanna ataatsimoorluta isumannaallisaanissatsinnut nukittorsaaqataavoq.
- Ikinngutivut pisariaqartippavut, atassuteqaatit nukittorsarnissaannut siunissamilu suliassanik ataatsimoorluta isumaginninnissatsinnut Canadamiut piumassuseqarnerat peqataaffigaarput, illersornissamut ministeri Troels Lund Poulsen oqarpoq.
