Canadami generalguvernørip sinniisoqarfik atoqqaartikkaa: - Inuiaat ataasiuvugut

Kalaallit Nunaata sunniuteqarnerpaavi Hotel Hans Egedemi tallimanngornermi nalunaaqutaq 17.00 ilasseqatigiipput.

Canadap sinniisoqarfianik ammaanersiornermi, partiit assigiinngitsuniit, Naalakkersuisuni siulittaasuusimasut, Namminersorlutik Oqartussat suliffeqarfiutaanni pisortat Canadamiullu Inuit siuttui nalliuttorsioqataapput.

Canadap generalguvernøria Mary Simon siulliulluni oqalugiartuuvoq.

Canadami nunanut allanut tunngasunut ministeri Anita Anand aamma nunanut allanut tunngasunut Naalakkersuisoq Vivian Motzfeldt tulliullutik oqalugiarput.

Canadami Kalaallit Nunaannilu suleqatigiinneq ataatsimullu Inuit ineriartornissaat pillugu, nunanut allanut attaveqarneq pingasuullutik oqalugiaatigaat.

Inulli erseqqinnerpaamik oqaaseqartoq tassaavoq, Kanatami Inuit Tapriinni ITK siulittaasoq Natan Obed.

- Naalagaaffiit Peqatigiit, Nato allalluunniit peqatigiit, ukiuni kingullerni 50-ini iluaqutigisavut naatsorsuutigisinnaajunnaalerpagut. Nunarsuarmili piffissami matumani tapersersuinermik takutitsisunik arlalissuarnik nunaqarpoq, taanna oqarpoq.

Piffissaq annilaarnartoq

Natan Obed qanoq Nunatsiavummeersuunini aamma Kalaallit Nunaat pillugu nutaarsiassani Inuit malinnaanerat pillugit oqaluttuarpoq.

Inuit pisinnaatitaaffiinut, nammineq aalajangiinissamut pisinnaatitaanermut aamma nunagisamut pisinnaatitaanermut 'ataqqinninnginnermik' taasaminik nutaarsiassani sammineqarput.

- Uagutsinnut Inunnut tamanna annilaarnarpoq. Maani Kalaallit Nunaanni Inunnut qanoq issimassanera takorloorsinnaanngilara. 

Inuit eriagisaat, Canadami Kalaallit Nunaannilu Inuit nunarsuarmut takutissinnaassagaat, ITK-mi siulittaasup neriuutigaa. 

Inuit Canadamut ilaanertik tulluusimaarutigigaat, ataqatigiilluarnerli suliassartaqangaatsiarsimaqisoq, Inuit Tapiriit Kanatami ITK siulittaasoq Natan Obed oqaluttuarpoq. – Inuttut (Inuit) nunasiaataaneq tamatta misiginikuuarput, inuiaqatigiillu nunasiaataaffigisatta kinguneqartussamik aaqqiissutissanik pilersitsiniartarpugut. Canadamiuunerput soorlu aamma Inuiunerput tanngassimaarutigisaqaarput. Ataqatigiinneq taama ittoq sivisuumik suliassartaqangaatsiartarpoq. Assi © : KNR / Markus Valentin

Naak nunarujussuarni inuiaqatigiiarannguugaluarluta, nunarput tamarluinnaat atorlugulu pingaartittarparput. Qaqqamut qiviaraangama naluneq ajorpara tumikka sumi tamaaniittut. Piginnittuuneq taama aamma paasineqarsinnaavoq.

Inuttut oqaluttuaminik oqalugiaateqartuni Natan Obed kisimiinngilaq.

Generalguvernøri Mary Simon Inuttut peroriartornini aamma oqalugiaatigaa.

Inuit ataasiuvugut

Mary Simonip naggueqatigiit inuit nunat killerniittut nunanut allanut attaveqaqatigiittalinngikkallarmatali qanoq suleqatigiittarsimanerat aallartitsissutigaa.

- Erfalasumik ullumikkut amusiinnarneq ajorpugut. Issittormiut attaveqatigiinnerat nukittooq nunat nunanut allanut attaveqaqatigiittarnerata atuutilinngikkallarmalli piuvoq.

KNR-ip nunanut allanut naalakkersuisoq, Vivian Motzfeldt (S) ilassinnittoqarnissaanut ulloq sioqqullugu oqaatigaa, taassuma nunatta ajunngitsumik pineqarneq utertitsiffigalugu suleqatigiinnermut nukittorsaataasussamik, Canadap sinniisoqarfissaanik ammaatitsisoqassasoq oqaatigaa. Assi © : KNR / Markus Valentin

Mary Simonip aamma Canadap nunanut allanut ministeriata, Anita Anandip Kalaallit Nunaanni naggueqatigiit inuit naggueqatigiinnut inunnut ilaanerat qanoq isiginerlugu oqaatigaat.

- Uanga nammineq ilaquttanni Kalaallit Nunaanni naggueqatigiit inuit ilaquttatsitut isigaagut; inuit ataasiuvugut, Mary Simon oqarpoq, nangillunilu:

- Kinguaariinni arlalinni nunat imarpiillu angalaffigaagut. Oqaaseqatigiillutalu kultureqatigippugut, ilaquttagut imminnut ilisarisimapput, ullumikkut aamma taamaappugut. Siunissamullu qaqugumorsuaq tamanna attatissavarput.

Vivian Motzfeldtip oqaaseqarnermini siunissami suleqatigiinnissaq sinniisoqarfiup nukittorsagassaa pillugu oqariartuut ilassuteqarfigaa.

- Sinniisoqarfimmik ammaaneq ilungersunartussarpassuarnut suleqatigiinnissamut nukittorsaataassaaq. Pingaartumik issittumi inissisimaffitsinni eqqissineq piujuartitsinerlu pillugit suleqatigiinnermi.