Kangia Qiterlermi akerleriinneq peqqutaalluni uulia akitsorpoq
Kangia qiterlermi akerleriinneq aallartimmalli Danmarkimi benzinap akia 1 literimut 1 koruuningajammik akitsorpoq, dieselillu akia 1 literimut 2 koruuningajammik akitsorluni.
Nutaarsiassaqartitsivik Ritzau ataasinngornermi taama allappoq.
Nunatsinnili uuliap akii qanittukkut akitsornavianngillat.
- Nunani allani pisut nunatsinni atuisut qanittukkut malugissanngilaat, KNI-mi pisortaaneq Jeppe Jensen oqarpoq.
Nunatta uuliamik pilersorneqarnera KNI-p ingerlataanit Polar Oilimit isumagineqarpoq.
Uuliap nunani allani akitsoriartornera KNI-miit malinnaaffigeqqissaarneqarpoq.
- Akit allanngorannginnissaannut kiisalu nunarsuatta sinnerani akitsorujussuartarnerinut atuisut illersorniarlutigit piffissami aalajangersimasumi atuuttussamik ikummatissat akii KNI-p qulakkeertarpai, KNI-mi pisortaaneq Jeppe Jensen oqarpoq.
Uuliamik assartuineq nunarsuaq tamakkerlugu eqqugaasoq
Kangia Qiterlermi akerleriittoqaannassappat nunani allani uulia suli akitsoriartuinnassasoq nutaarsiassaqartitsivik Ritzau ataasinngormat allappoq.
Israelip USA-llu Iranimut saassussinerisa kingunerisaanik uuliamik Iranip sineriaatigut Hormuzikkut assartuineq unippoq. Uulia Hormuzikkut assartorneqartartoq uuliap nunarsuaq tamakkerlugu assartorneqartup tallimaraarterutigaa.
Ral-ip pisortaata Niels Clemensenip akit qaffakkumaartut tamannalu suliffeqarfimmit maajip aallaqqaataanni takuneqarsinnaalissasoq Sermitsiamit apersorneqarnermini oqaatigaa.
