Arsaanneq: Kalaallit ilaasortanngorniarnerat Concacafip itigartippaa
Arsaannermi nunat tamalaat kattuffianni ilaasortanngorniarluni qinnuteqarnermi isumalluarluni qilanaarneq pakatserujussuarnermit Kalaallit arsaattarfut kattuffianni KAKmi taarserneqarpoq.
Amerikap avannaani Caribiamilu arsaattartut kattuffissuanni Concacafimi immikkut ittumik ataatsimeersuarnermi ilaasortat tamarmik isumaqatigiillutik kalaallit ilaasortanngorniarnerat itigartippaat. KAK tusagassiutinut nalunaarummi taama allappoq.
KAKp pisortatigoortumik qinnuteqaatini Concacafimut januarimi tunniuppaa. Qinnuteqaatip tigunera uppernarsarlugu ataatsimeeqatiserinninnermi Concacaf taamani ilisimatitsivoq ataatsimeeqatigiserineqarneq ilaasortanngorniarnermi akuersissutitut isigineqassanngitsoq.
Itigartitaaqqinneq
Maanna tassa aalajangertoqarpoq tamannalu KAKmi iluarineqanngivippoq.
- Akunnerit 24-it tulliuttut pisoq pillugu ilutsinni nalilersuillutalu oqallisigissavarput, aalajagiussamut qanoq iliortariaqassanerluta, KAKmi siulittaasoq Kenneth Kleist tusagassiutinut nalunaarummi allappoq.
- Maannamulli aalajagiusimavarput aalajangiineq arsarnermi demokratiimut ajugaanerunngitsoq, tassami aalajangiineq una nunarsuatsinni arsarnermut tamanut periarfissiinngilaq, aamma aalajangiinerup takutippaa nunat minnerit namminneq erfalasortik atorlugu arsarsinnaalernissaminnut unammillernartumik annertoorujussuarmik inissisimasut, Kenneth Kleist oqarpoq.
Nunat tamalaat kattuffianni ilaasortanngornissamik kissaateqarneq sivisuumik arsaattartut kattuffianni oqallisaavoq.
Europami arsaattartut kattuffianni UEFA-mi ilaasortanngorniarneq misissorneqaqqaaraluarpoq qallunaat arsaattartut kattuffiat DBU suleqatigalugu. UEFA-li itigartitsivoq tunngavilersuutigalugu nunatut namminersortutut Nunarput FN-mi ilaasortaanngimmat.
KAKmi siulittaasoq Kenneth Kleist annerusumik oqaaseqartinniarlugu KNR-miit saaffigineqarpoq. Taassumali tunulequttani oqaloqatigilluaqqaarlugit annerusumik oqaaseqarnissani kissaatigivaa.
