Pisortatigoortumik arsaannermi nunanut allanut unammisinnaanerit qanilliallattut

Anguniagaq sivisuumik anguninarneqartoq KAK-mut qanilliallappasippoq.
Tassami illoqarfissuarmut Miamimut nunatsinneersut amerikap avannaani arsaattartut kattuffissuannit Concacafimiit februarimi ataatsimiigiaqqusaapput, nunatta nunat tamalaat kattuffianni ilaasortanngornissaa oqaluuserineqassalluni.
Nunat tamalaat kattuffianni ilaasortanngornikkut kalaallit arsaannermi nunanut allanut unammisartut erfalasorput atorlugu pisortatigoortumik nunanut allanut unammisinnaanngussapput. Unammersuarnernut anngunniuttunittaaq kalaallit peqataasinnaanngussapput.
Nunarput nunat tamalaat kattuffianni ilaasortaatinnani pisortatigoortumik arsaannermi nunanut allanut unammisinnaanngilaq. Nunat tamalaat kattuffiini ilaasortat kisimik pisortatigoortumik unammisinnaapput tv-kkullu tamanna takutissinnaallugu.
- Ataatsimiinnermi oqaluuserisassat suli tigunngilagut. Taamaattoq ataatsimiinnissaq sioqqullugu piareersaatitta takussutissartaat nassiutereerpagut, KAK-mi siulittaasoq Kenneth Kleist KNR-mut oqarpoq.
Nunarput "tuniniarniaraat"
KAK Concacafimiit ilimasaarneqareerluni ataatsmiinnissamut neriuuteqarpallaarnaversaarpoq.
- Ataatsimiigiaqqusissummi ilisimatitsissutigineqarpoq ataatsimiiaqqussaaneq imatut paasineqassanngitsoq tassa ingerlaannaq ilaasortanngulersugut.
- Aamma uannut pingaaruteqarpoq nunaqqatitsinnut oqaatigissallugu ingerlaannaq ilaasortanngulinngitsugut. Taamaattoq ataatsimiinnermi nunarput ’tuniniarumaarparput’ siunissamullu pilersaarutivut oqaluttuaralugit. Aamma ataatsimiinnermut uppernarsaatitut nassatarisinnaasatsinnik naalakkersuisuniit tapersersorneqarnissarput pingaaruteqarpoq , Kenneth Kleist oqarpoq.
Ataatsimiinnerup kingorna nunani tamalaani kattuffissuarmi ilaasortanngorniarnermi suliniaqqinnissaq KAKmi piareersarneqalereerpoq.
- Ataatsimiinneq naammassiniariarpat suliassat assigiinngitsut aallartissavagut. Imaassinnaavoq Concacafimeersut nunatsinnut tikeraarsarneqartut. Ilimagisinnaavarput ataatsimeeqqinnissaq isumaqatigiissutaasoq taamaalissappallu suleriaqqinnissami pilersaarut A, B aamma C piareersarneqassapput, Kenneth Kleist oqarpoq.