Oqaluttuarisaanermi pisup nunarput arsaannerup silarsuaani tusaamasanngortissavaa
Kalaallit Arsaattartut Kattuffiat, KAK, ulluni makkunani nunarsuarmi tusaamasaavoq. Kattuffik CONCACAF-imi ilaasortanngornissamik qinnuteqaammik nassiusseqqammerpoq, oqaluttuarisaanermi aatsaat taamaaliortoqarpoq.
Nunani tamalaani arsaattartut akornannut piniarluni nunarput maanna oqaluttuarisaanermi siullerpaamik taamaaliorpoq, tamannalu nunarsuarmioqatitsinnit soqutigineqangaatsiarpoq.
- Kalaallit Arsaattartut Kattuffiata CONCACAF-imut qinnuteqaammik kiisami nassiusinera tulluusimaarutigalugulu nuannaarutigeqaara, angutit nunarput sinnerlugu nunanut allanut unammisartuisa sungiusaasuat Morten Rutkjær taama oqarpoq.
Qinnuteqaat oqaluttuarisaanermi pingaarutilik pillugu KAK, BBC-mit New York Timesimillu attavigineqarpoq. Qinnuteqaat akuerineqassappat nunatsinni arsaannermi pisuni aamma aannertussaqaaq.
Nunanut allanut sungiusaasup aamma maanna siulersuisuusut Kenneth Kleistimit siuttoqartut annertuumik suliniuteqarneratigut qinnuteqaasiorneq iluatsinneqarpoq.
- Siulersuisut peqatigalugit qinnuteqaammik nassiussisuusinnaanera assorsuaq tulluusimaarutigaara. Siulittaasuusimasoq aamma uuminnga suliniuteqaqataasimasut qujassutissaqarfigaakka, tamanna qularnanngilaq, Kalaallit Arsaattartut Kattuffianni siulittaasoq Kenneth Kleist oqarpoq.
Qinnuteqaasiorneq ukiuni sisamani suliarineqarpoq taamaammallu siulersuisunit arlalinnit suliarineqarluni.
CONCACAF kattuffiuvoq nunanit amerikap avannaaneersunit qiterpasissuaneersunit Caribiameersunillu ilaasortaaffigineqartoq, kattuffiup ilaasortaasa ilai tassaapput Canada, Mexico aamma USA.
Anguniakkat annertuut
CONCACAF-imi ilaasortaaneq Kalaallit Nunaani nunanut allanut unammisartunut peqatigiiffinnullu annertuumik kinguneqarsinnaavoq, unammiuaarnernilu assigiinngitsuni arlalinni peqataasinnaanermik periarfissiissalluni.
- Nunarsuarmi arsaattartut akornannut pinissatsinnut iluaqutaassaaq. Unammiuaarnerni assigiinngitsuni innuttaasunit tapersersorneqarnerput soqutigineqarnerpullu malugisaratsigu uatsinnut innuttaasunullu pingaaruteqarpoq, Kenneth Kleist oqaluttuarpoq.
Nunanut allanut unammisartut unamminernik amerlanernik peqataasinnaalernermikkut kisimik iluaquserneqassanngillat.
Meeqqat inuusuttullu nunanut allanut unammisartunngornissamut pilerisunnerulernissaannik aamma kinguneqarsinnaammat, ungasinnerusoq eqqarsaatigalugu sunniuteqarsinnaasoq nunanut allanut unammisartut sungiusaasuat isumaqarpoq.
- Angutit nunanut allanut unammisartut kisimik pineqanngillat. KAK-ip suliniuteqarnerulerneratigut futsalertartut, arnat arsaattartut meeqqallu aningaasatigut aamma iluaquserneqarsinnaapput, taamaammat kikkut tamarmik pissarsiffigissavaat, Morten Rutkjær oqarpoq.
Suleqatit pingaarutillit
KAK-ip qinnuteqaasiornermini Dansk Boldspil-Union (DBU) aamma Islands Fodboldforbund (KSI) suleqatigai. Nunatsinnut arsaaffinnut piumasaqaatit piviusunngortinneqarnissaata tungaanut, nunatta nunami namminermi unammisussanerani, unamminerit Islandimi ingerlanneqarallartarsinnaaneranik suleqatigiinnikkut ilaatigut anguneqarsinnaavoq.
- Tamannalu qinnuteqaatip pimoorunnneqarneranik ersersitsivoq. Tassa siullertut, aappaattut pingajuattullu pilersaaruteqarpugut, eqqarsaatigilluaqqissaagaavoq, nunanut allanut sungiusaasoq oqarpoq.
Taamaammat Morten Rutkjær isumalluarpoq, CONCACAF-illu nunarput maanna isiginngitsuusaarsinnaajunnaaraa oqaatigalugu.
Kattuffinni annerni nunatta ilaasortaaffigisinnaasaanni CONCACAF periarfissatuaavoq. KAK-ip kattuffik ilaasortaaffigilerniarlugu siusinnerusukkut saaffigereerpaa iluatsinnaguli.
Tamannali uniffiginagu qinnuteqaat oqalutttuarisaanermi pingaarutilik CONCACAF-ip allaffeqarfianut Miamimut ornigulluni arsaattartut kattuffiannit tunniunneqarpoq.
