Kenneth Kleist KAK-mi siulittaasunngorpoq
Kenneth Kleist maanna KAK-mi siulittaasuulerpoq.
Arfininngorneq oktoberip 21-at KAKp ileqquusumik ataatsimeersuarnerani eqqissisimasumik siulittaasussarsisoqarpoq Kenneth Kleist unammillerteqarani qinigaammat.
- Qujasuinnianngikkaluarpunga, kisianni qinersinermi unammillerteqarsimasuuguma nuannersimassagaluarpoq. Kisianni aamma unammillertoqannginnera tatiginninnermik takutitsinertut paasivara, Kenneth Kleist KNR-mut oqarpoq.
Siulittaasututut tunuartoq Benjamin Kielsen ataatsimeersuarneq sioqqullugu nalunaarpoq siulittaasutut qinigassanngorteqqinniarani. Taanna maanna KAKp siulersuisuini ilaasortaajunnaavippoq Kenneth Kleistip saniatigut siulersuisuni ilaasortaat sisamaasut tassaammata Tasiilameersoq, Sisimiuneersoq Nuummeersullu.
- Suliassarput annertooq tulleq tassaavoq aappaagu pissartanngorniunnissat pilersaarusiorlugillu naammassinissaat, Kenneth Kleist oqarpoq.
Pissartanngorniunnissanut arlalinnut aaqqissuisuunissamut qinnuteqartoqareerpoq allallu aaqqissuisoorusussinnaasut eqqarsaatigalugit KAK kaumissaarivoq futsalimi silamilu pissartanngorniunnissamut aaqqissuisoorusuttut novemberip aallaqqaataa nallertinnagu qinnuteqaqqullugit.
Ulloq puigunaatsoq
Suliassaq annertooq alla tassaavoq Amerikap avannaani arsaattartut kattuffissuannut Concacafimut ilaasortanngorniarnerup isumaqatigiinniutigeqqinnissaa.
- Ilisimatinneqarpugut ilaasortanngorsinnaanermut qanittuararsuanngorsimasugut. Suliassarpassuarma akornanni tamanna pingaarnerit ilagissavaat, Kenneth Kleist oqarpoq.
Arfininngornermilu Kenneth Kleist misigisaqalaavissorpoq.
Eqqaaneqareersutut KAKmi siulittaasunngorpoq. Tamanna pereermat timersortartunik nersornaasiinermut Maligassiuisut showimut ornigukkasuarpoq tassanilu aqutsisuullammattut toqqagaalluni.
Taamatut nersornaatisivoq B-67-mi Nuummeersumi suliniarluarnini pillugu tassani suleqatissarsiornermi FCK Sverigemilu futsalimi pikkorinnersaasut Orebro SK kiisalu Savalimmiuni peqatigiiffik Klaksvik isumaqatigiissuteqarfigineqarmata.
- Ulloq puigunaatsuuvoq. Taama pineqarluni assut maniguunnarpoq, Kenneth Kleist oqarpoq.
KAK-mi siulersuisuni ilaasortat allat tassaalerput: Aron Jonathansen, Loké Svane, Jaküp Emil Hansen og Hans Frederik Olsen.
